لاہور(ایم وائے کے نیوز ٹی وی) لاہور کے علاقے ہیئر میں سوشل میڈیا کی دنیا سے ایک حیران کن اور تشویشناک واقعہ سامنے آیا ہے جہاں مشہور ٹک ٹاکرز سوزین اور نمرہ پر اپنی سابقہ دوست اجالا کے گھر پر فائرنگ کروانے کا الزام عائد کیا گیا ہے۔ صرف دوستی ختم کرنے پر اس حد تک چلے جانا، سوشل میڈیا شہرت کے اندھے جنون اور ذاتی رقابت کی خطرناک شکل کو بے نقاب کرتا ہے۔
پولیس کے مطابق متاثرہ لڑکی اجالا کے بھائی کی مدعیت میں مقدمہ درج کرلیا گیا ہے جس میں واضح طور پر الزام لگایا گیا ہے کہ دوستی ختم کرنے پر سوزین اور نمرہ نے پہلے اجالا کو سنگین نتائج کی دھمکیاں دیں اور پھر عملی طور پر ان دھمکیوں کو فائرنگ کی صورت میں حقیقت بنا دیا۔ ایف آئی آر میں کہا گیا ہے کہ سوزین اور نمرہ نے اپنے ساتھی احمد کے ذریعے اجالا کے گھر پر فائرنگ کروائی۔ خوش قسمتی سے فائرنگ کے واقعے میں کوئی جانی نقصان نہیں ہوا تاہم اس واقعے نے علاقہ مکینوں کو شدید خوف و ہراس میں مبتلا کر دیا ہے۔ پولیس حکام کے مطابق مقدمہ درج کر لیا گیا ہے اور نامزد ملزمان سوزین، نمرہ اور احمد کی گرفتاری کے لیے چھاپے مارے جا رہے ہیں۔
پولیس حکام نے یہ بھی کہا ہے کہ واقعے کے تمام پہلوؤں پر تفتیش جاری ہے اور ملزمان کی گرفتاری کے بعد ہی اصل حقائق سامنے آئیں گے۔ ابتدائی شواہد اور بیانات سے واضح ہوتا ہے کہ یہ واقعہ محض ذاتی عناد اور انا کی تسکین کے لیے کیا گیا جو نہ صرف قانون کی صریح خلاف ورزی ہے بلکہ سوشل میڈیا پر شہرت پانے والے نوجوانوں کے کردار پر بھی سوالیہ نشان کھڑا کرتا ہے۔
