امریکی فوج کا بلیک ہاک ہیلی کاپٹر کولوراڈو میں حادثے کا شکار
امریکی ریاست کولوراڈو کے پہاڑی علاقے میں امریکی فوج کا بلیک ہاک ہیلی کاپٹر حادثے کا شکار ہو کر تباہ ہوگیا۔
حکام کے مطابق ہیلی کاپٹر گولڈن گیٹ کینیون اسٹیٹ پارک کے شمال میں واقع جنگلاتی علاقے میں غیر متوقع لینڈنگ کے دوران حادثے کا شکار ہوا۔ ہیلی کاپٹر میں 4 افراد سوار تھے، تاہم خوش قسمتی سے کسی جانی نقصان کی اطلاع نہیں ملی۔
امریکی فوج کے ترجمان کے مطابق حادثہ تربیتی مشق کے دوران پیش آیا۔ حادثے کی اصل وجہ تاحال معلوم نہیں ہوسکی۔
امریکی میڈیا کے مطابق حادثے کا شکار ہونے والے بلیک ہاک ہیلی کاپٹر کی مالیت تقریباً 30 سے 33 ملین ڈالر تھی۔ حکام نے جنگلاتی علاقے میں ہیلی کاپٹر کا ملبہ تلاش کرلیا ہے اور واقعے کی تحقیقات جاری ہیں۔
