امریکی خفیہ ایجنسی سی آئی اے کے سربراہ اچانک ماسکو پہنچ گئے
امریکی خفیہ ایجنسی سی آئی اے کے سربراہ جان ریٹکلف اچانک روس کے دارالحکومت ماسکو پہنچ گئے ہیں۔
روسی میڈیا کے مطابق امریکی فوجی ٹرانسپورٹ طیارہ بوئنگ ماسکو پہنچا، جو اس سے قبل لٹویا کے دارالحکومت ریگا میں موجود تھا اور وہاں اینڈریوز ایئر فورس بیس سے پہنچا تھا۔
رپورٹس کے مطابق امریکی صدر ڈونلڈ ٹرمپ سمیت اعلیٰ امریکی حکام بیرونِ ملک دوروں کے لیے اینڈریوز ایئر فورس بیس استعمال کرتے ہیں۔
سی آئی اے سربراہ کے دورۂ ماسکو کی وجوہات اور روسی حکام سے ممکنہ ملاقاتوں کی تفصیلات تاحال سامنے نہیں آئی ہیں۔
واضح رہے کہ اعلیٰ سطح کے امریکی اور روسی حکام کے درمیان براہِ راست ملاقاتیں انتہائی کم ہی ہوتی ہیں، اس لیے جان ریٹکلف کا اچانک ماسکو پہنچنا خاص اہمیت کا حامل قرار دیا جا رہا ہے۔
