پاکستان اور سعودی عرب کے درمیان اقتصادی تعلقات کو اسٹریٹجک شراکت داری میں بدلنے کی خواہش
پاکستان نے سعودی عرب کے ساتھ اپنے اقتصادی تعلقات کو اسٹریٹجک اقتصادی شراکت داری میں تبدیل کرنے کی خواہش کا اظہار کیا ہے۔
منگل کے روز اسلام آباد میں وزیراعظم شہباز شریف سے سعودی پاک بزنس کونسل کے چیئرمین شہزادہ منصور نے ملاقات کی، جس میں دونوں ممالک کے درمیان اقتصادی تعاون اور سرمایہ کاری کے فروغ کے امکانات پر تفصیلی تبادلۂ خیال کیا گیا۔
اس موقع پر وزیراعظم شہباز شریف نے کہا کہ پاکستان اور سعودی عرب کے درمیان حکومت سے حکومت اور کاروبار سے کاروبار کی سطح پر مشترکہ تعاون کو مزید وسعت دینے کے لیے یہ بہترین وقت ہے۔
ملاقات میں شہزادہ منصور نے پاکستان کے زراعت، بندرگاہوں اور ہائی ویز سمیت مختلف شعبوں میں سرمایہ کاری میں دلچسپی کا اظہار کیا۔ انہوں نے پاکستان کے ساتھ تجارتی اور کاروباری روابط مزید مضبوط بنانے میں سعودی حکومت اور کاروباری برادری کی دلچسپی کا بھی اعادہ کیا۔
