بھارت: نایاب گنگا ڈولفن پکڑ کر گھر لے جانے والا ماہی گیر گرفتار
بھارتی ریاست بہار کے ضلع سہرسہ میں نایاب نسل کی گنگا ڈولفن پکڑ کر گھر لے جانے والے ماہی گیر کو گرفتار کرلیا گیا۔
بھارتی میڈیا کے مطابق ماہی گیر کے جال میں کوسی دریا سے نایاب گنگا ڈولفن پھنس گئی تھی، جسے آزاد کرنے کے بجائے وہ اپنے گھر لے گیا۔
واقعے کی ویڈیو ایک مقامی شخص نے موبائل فون سے بنا کر سوشل میڈیا پر شیئر کردی، جو دیکھتے ہی دیکھتے وائرل ہوگئی۔
ویڈیو سامنے آنے کے بعد محکمہ جنگلات اور ضلعی انتظامیہ نے کارروائی کرتے ہوئے ماہی گیر کے خلاف مقدمہ درج کیا اور 3 روز بعد اسے گرفتار کرلیا۔
بھارتی میڈیا کے مطابق وائلڈ لائف پروٹیکشن ایکٹ 1972 کے تحت ڈولفن کے شکار اور انہیں ہلاک کرنے پر پابندی عائد ہے۔
