پمز اسپتال نے میٹرنٹی کے نئےکیسز لینے سے انکارکردیا

اسلام آباد: پمز اسپتال کا میٹرنٹی کے نئے کیسز لینے سے انکار

اسلام آباد کے پمز اسپتال کی انتظامیہ نے میٹرنٹی کے نئے کیسز لینے سے انکار کردیا ہے۔

پمز اسپتال کے ایگزیکٹو ڈائریکٹر رانا عمران سکندر نے جیو نیوز سے گفتگو کرتے ہوئے نئے میٹرنٹی کیسز نہ لینے کی تصدیق کی۔ ان کا کہنا تھا کہ اسپتال میں گنجائش سے زیادہ مریض نہیں رکھے جاسکتے، اسی وجہ سے نئے کیسز لینے سے معذرت کی جارہی ہے۔

رانا عمران سکندر کے مطابق بچوں کی نرسری میں 15 بیڈ مکمل طور پر جل گئے ہیں۔ نرسری میں پہلے 50 بیڈ موجود تھے، تاہم اب صرف 35 بیڈ باقی رہ گئے ہیں۔

انہوں نے بتایا کہ بچوں اور دیگر مریضوں کو راولپنڈی اور اسلام آباد کے دیگر اسپتالوں میں منتقل کیا جائے گا۔ اس حوالے سے متعلقہ اسپتالوں کو خطوط بھی ارسال کردیئے گئے ہیں، جبکہ کچھ بچوں کو پولی کلینک منتقل کیا گیا ہے۔