امتیابھ نے غلط تلفظ کی ادائیگی پر مداحوں سے معافی مانگ لی
ممبئی :بالی وڈ کے لیجنڈ اداکار امیتابھ بچن نے ایک بار پھر بڑے پن کا ثبوت پیش کیا ہے جس سے یہ واضح ہوتا ہے کہ ان کی شخصیت اداکاری کے ساتھ ساتھ انسانیت سے بھی مزین ہے۔ غلطیاں ہر انسان سے ہوتی ہیں لیکن اپنی غلطی کو تسلیم کرنا اعلیٰ ظرفی ہے۔
بھارتی میڈیا کے مطابق امیتابھ بچن نے اپنے مداحوں سے سوشل میڈیا پر مراٹھی لفظ کے غلط تلفظ پر معذرت کر لی۔ کچھ دن قبل بگ بی نے انسٹاگرام پر ایک ویڈیو شیئر کی تھی جس میں وہ سڑکوں پر کوڑا نہ پھینکنے کا عہد کرتے دکھائی دیے۔ اس ویڈیو میں انہوں نے مراٹھی میں کہا تھا، ’’می کچرا کرنا نہیں‘‘ یعنی ’’میں کچرا نہیں کروں گا‘‘۔
یہ ویڈیو سوشل میڈیا پر لاکھوں لائکس اور ویوز حاصل کرنے میں کامیاب رہی، مگر بعد میں امیتابھ بچن کو اپنے مراٹھی تلفظ کی غلطی کا احساس ہوا۔ اس پر انہوں نے فوری طور پر ایک نئی ویڈیو شیئر کی، جس میں انہوں نے اپنی غلطی کو درست کر لیا۔
