شوہر اپنی بیویوں کو ایسے لباس پہنائیں جس سے دونوں کی عزت قائم رہے:ثنا خان

شوہر اپنی بیویوں کو ایسے لباس پہنائیں جس سے دونوں کی عزت قائم رہے:ثنا خان

ممبئی: اسلام کی خاطر شوبز انڈسٹری کو خیرباد کہنے والی سابق بھارتی اداکارہ ثنا خان نے کہا ہے کہ اُنہیں حیرت ہوتی ہے اُن مردوں پر جو اپنی بیویوں کو بولڈ اور تنگ لباس پہنا کر گھر سے باہر لے جاتے ہیں۔

بھارتی میڈیا کے مطابق، ثنا خان نے اپنے حالیہ انٹرویو میں کہا کہ ہر مرد چاہتا ہے کہ اُس کی بیوی اچھا لباس پہنے اور خوبصورت نظر آئے، لیکن جب میں ایسے مردوں کو دیکھتی ہوں جو اپنی بیویوں کو چھوٹے، تنگ اور بولڈ لباس پہننے کی اجازت دیتے ہیں، تو مجھے بہت عجیب لگتا ہے۔ مجھے ایسے مردوں پر حیرت ہوتی ہے کہ آپ کیسے اپنے گھر کی عزت کو ایسے لباس میں باہر لے جا سکتے ہیں۔

ثنا خان نے ایسے مردوں سے سوال کیا کہ آپ بولڈ لباس پہننے پر اپنی بیوی پر فخر کیسے کر سکتے ہیں؟ آپ کیسے کہہ سکتے ہیں کہ آپ کی بیوی بہت اچھی لگ رہی ہے؟

سابق اداکارہ نے کہا کہ اگر آپ اپنی بیوی کو بولڈ لباس میں باہر لے جائیں اور ایک راہ چلتا مرد اُس پر نامناسب جملے کہے تو کیا یہ آپ کے لیے فخر کا مقام ہوگا؟

اُنہوں نے کہا کہ مردوں کو یہ معلوم ہونا چاہیے کہ اُن کی بیوی اُن کی عزت ہے، اور اُنہیں ایسے لباس پہنائے جانے چاہئیں جن میں آپ دونوں کی عزت قائم رہے۔

ثنا خان نے ماضی کو یاد کرتے ہوئے کہا کہ سال 2019 میں، جب میں نے شوبز انڈسٹری کو خیرباد کرنے کا فیصلہ کیا، تو مجھے احساس ہوا کہ میں اپنے بولڈ لباس اور ڈانس کی وجہ سے نوجوانوں کو گمراہ کر رہی ہوں۔

واضح رہے کہ ثنا خان نے سال 2020 میں بالی ووڈ کو خیرباد کہہ دیا تھا اور سال 2021 میں اُنہوں نے مفتی انس سید سے شادی کر لی تھی۔ جولائی 2023 میں ثنا خان اور مفتی انس کے ہاں بیٹے کی پیدائش ہوئی تھی، جس کا نام اُنہوں نے طارق جمیل رکھا۔