حمیرہ اصغر کی لاش 8 سے 10 ماہ پرانی نکلی، پوسٹ مارٹم رپورٹ نے کئی سوالات کھڑے کر دیے

کراچی کے پوش علاقے ڈیفنس فیز 6 میں فلیٹ سے مردہ حالت میں ملنے والی پاکستانی اداکارہ حمیرہ اصغر کی ابتدائی پوسٹ مارٹم رپورٹ سامنے آگئی ہے، جس نے واقعے کو مزید پراسرار اور سنجیدہ رخ دے دیا ہے۔

پوسٹ مارٹم رپورٹ کے مطابق حمیرہ اصغر کی موت 8 سے 10 ماہ قبل ہوئی، جبکہ لاش ڈی کمپوز ہو کر آخری اسٹیج پر پہنچ چکی تھی۔ رپورٹ میں بتایا گیا کہ مرحومہ کے جسم کی کوئی ہڈی ٹوٹی ہوئی نہیں، تاہم نچلے جسم کا گوشت مکمل طور پر گل چکا تھا اور لاش میں کیڑے پڑ چکے تھے۔ طبی ماہرین نے حمیرہ کے بال اور قمیض کے ٹکڑے کیمیکل معائنے کے لیے بھیجے ہیں تاکہ مزید حقائق سامنے لائے جا سکیں۔ تاہم رپورٹ میں یہ بھی کہا گیا ہے کہ لاش کی حالت کے باعث جسمانی زیادتی کا پتہ چلانا ممکن نہیں۔

یاد رہے کہ 8 جولائی کو کرائے کی عدم ادائیگی پر عدالتی بیلف کی کارروائی کے دوران، فلیٹ کا دروازہ توڑ کر داخل ہونے پر اداکارہ کی لاش برآمد ہوئی تھی۔ پولیس کے مطابق حمیرہ اصغر نے یہ فلیٹ 2018 میں کرائے پر لیا تھا اور 2024 سے کرایہ ادا نہیں کر رہی تھیں، جس پر مالک مکان نے عدالت سے رجوع کیا تھا۔ ابتدائی تحقیقات میں پولیس نے بتایا کہ اداکارہ کا موبائل فون اکتوبر 2024 میں آخری مرتبہ استعمال ہوا تھا جبکہ سوشل میڈیا پر بھی وہ 9 ماہ سے غیر فعال تھیں۔ پولیس کا کہنا ہے کہ واقعے کی مختلف پہلوؤں سے تحقیقات جاری ہیں اور فارنزک رپورٹس کے مکمل ہونے کے بعد ہی موت کی اصل وجوہات کا تعین ممکن ہو سکے گا۔