بھارتی میڈیا کے مطابق بالی ووڈ کے تین مشہور اداکاروں شاہ رخ خان، اجے دیوگن اور ٹائیگر شروف کے خلاف گمراہ کن اشتہارات کی بنیاد پر مقدمہ درج کر لیا گیا ہے۔ تینوں اداکاروں نے ایک معروف الائچی برانڈ کی توثیق کی تھی، جو درحقیقت پان مسالہ بنانے والی کمپنی کا حصہ ہے۔ اشتہار میں متنازعہ ٹیگ لائن ‘بولو زبان کیسری’ شامل تھی، جس پر اعتراض اٹھایا گیا ہے۔
موہن سنگھ ہانی نامی شخص نے شکایت درج کرائی، جس میں دعویٰ کیا گیا کہ اشتہار نوجوانوں کو گمراہ کرتا ہے اور غلط معلومات کو فروغ دیتا ہے۔ ان کا کہنا ہے کہ یہ برانڈ زعفران پر مشتمل ہونے کا جھوٹا دعویٰ کر رہا ہے۔ شاہ رخ خان، اجے دیوگن، اور ٹائیگر شروف جیسے مشہور اداکار لاکھوں لوگوں کے رول ماڈل ہیں، اس لیے ان کی شرکت نوجوانوں پر منفی اثر ڈال سکتی ہے۔اشتہار پر فوری پابندی لگانے اور اداکاروں و کمپنی پر بھاری جرمانہ عائد کرنے کا مطالبہ کیا گیا ہے۔کوٹا کنزیومر ڈسپیوٹ ریڈرسل کمیشن نے تینوں اداکاروں اور ویمل پان مسالہ بنانے والی کمپنی کو نوٹس جاری کر دیا ہے۔ انہیں عدالت میں حاضر ہونے کی ہدایت دی گئی ہے۔
