ڈپریشن سے دور رہنے کیلئے روزانہ یہ پھل کھائیں؟

ڈپریشن سے دور رہنے کیلئے روزانہ یہ پھل کھائیں؟

کہا جاتا ہے کہ ایک سیب روزانہ کھانے سے آپ ڈاکٹروں سے دور رہ سکتے ہیں، اور حالیہ تحقیق نے اس بات کو مزید تقویت دی ہے کہ یہ صحت کے فوائد دماغی صحت تک بھی پہنچ سکتے ہیں۔ سنگاپور میں کی جانے والی ایک طبی تحقیق سے پتہ چلا ہے کہ روزانہ سیب کھانے سے آپ خود کو ڈپریشن جیسے عام دماغی مسائل سے محفوظ رکھ سکتے ہیں۔

لو لین اسکول آف میڈیسین کی اس تحقیق میں یہ بات سامنے آئی ہے کہ غذائی اجزاء سے بھرپور پھلوں کا استعمال ڈپریشن کے خطرے کو کم کرنے میں مددگار ثابت ہوتا ہے۔ ڈپریشن ایک ایسا مرض ہے جو آج کل ہر عمر کے افراد کو متاثر کر رہا ہے اور اس سے متاثرہ افراد کو دماغی اور جسمانی دونوں طرح کے مسائل درپیش آسکتے ہیں۔

تحقیق میں بتایا گیا ہے کہ عمر کے ساتھ دماغ کی تنزلی کے باعث ڈپریشن کا خطرہ بڑھ جاتا ہے، لیکن روزانہ پھلوں کے استعمال سے اس خطرے میں 21 فیصد تک کمی کی جا سکتی ہے۔ سیب، مالٹے اور کیلے جیسے پھل اینٹی آکسائیڈنٹس کے بہترین ذرائع ہیں اور ان میں موجود وٹامنز، کیروٹینز اور دیگر اجزا تکسیدی تناؤ اور جسمانی ورم کو کم کرتے ہیں، جو ڈپریشن کے خطرے میں اضافے کے عوامل ہیں۔

یہ تحقیق بتاتی ہے کہ درمیانی عمر کے افراد میں دائمی امراض اور نیند کی مشکلات ڈپریشن کے خطرے کو بڑھا دیتی ہیں، جس سے روزمرہ کی زندگی مشکل ہو جاتی ہے۔ پھلوں کا استعمال ان مسائل کی شدت کو کم کر سکتا ہے اور دماغی صحت کو بہتر بنا سکتا ہے۔