مجھے کینسر کی تشخیص ہوئی، صحتیاب ہونے میں سورۃ الرحمٰن نے بہت مدد کی: نعمان اعجاز

پاکستانی اداکار نعمان اعجاز کا کینسر کی تشخیص اور صحتیابی سے متعلق اہم انکشاف

پاکستان کے سینئر اداکار نعمان اعجاز نے انکشاف کیا ہے کہ انہیں 2024 میں کان کے قریب کینسر کی تشخیص ہوئی تھی، تاہم کامیاب آپریشن کے بعد ٹیومر نکال دیا گیا اور بعد ازاں ڈاکٹرز نے انہیں کیموتھراپی کی ضرورت نہ ہونے سے آگاہ کیا۔

ایک حالیہ انٹرویو میں نعمان اعجاز نے بتایا کہ جس روز انہیں کینسر کا علم ہوا، انہوں نے نماز کے دوران اللہ سے دعا کی کہ اگر دنیا میں ان کی ضرورت نہیں تو انہیں اپنے پاس بلا لے، کیونکہ وہ اپنی فیملی کو تکلیف میں نہیں دیکھنا چاہتے تھے۔

اداکار نے بتایا کہ وہ اسپتالوں کے چکر اور کیموتھراپی جیسے تکلیف دہ عمل سے گزرنے سے خوفزدہ تھے۔ اسی دوران ان کے ایک قریبی دوست نے انہیں سورۃ الرحمٰن پڑھنے کا مشورہ دیا۔

نعمان اعجاز کے مطابق وہ اس دن سے آج تک سورۃ الرحمٰن کی تلاوت کرتے ہیں اور ان کا یقین ہے کہ صحتیابی میں سورۃ الرحمٰن کا بہت بڑا کردار ہے۔

انہوں نے بتایا کہ ان کا کامیاب آپریشن ہوا اور ٹیومر نکال دیا گیا۔ 23 جولائی 2024 کو ان کی پہلی کیموتھراپی شروع ہونا تھی، تاہم ایک روز قبل ڈاکٹرز نے انہیں بتایا کہ ٹیسٹ میں بیماری کا کوئی نشان نہیں ملا، اس لیے کیموتھراپی کی ضرورت نہیں۔

اداکار نے اپنی صحتیابی کو اللہ تعالیٰ کا کرم قرار دیتے ہوئے کہا کہ وہ اس مرحلے سے گزرنے کے بعد زندگی کو ایک مختلف انداز سے دیکھتے ہیں۔