ڈی چوک سے لاپتا 200 افراد کی فہرست تیار، عمران خان کو پیش کی جائے گی، بیرسٹر گوہر
راولپنڈی:چیئرمین پی ٹی آئی بیرسٹر گوہر نے کہا ہے کہ ڈی چوک سے لاپتا 200 افراد کی فہرست تیار ہے، یہ رپورٹ عمران خان کو دیں گے۔
اڈیالہ جیل کے باہر میڈیا کے نمائندوں سے بات کرتے ہوئے چیئرمین پاکستان تحریک انصاف بیرسٹر گوہر نے کہا کہ پی ٹی آئی نے ڈی چوک احتجاج کے دوران 200 مسنگ پرسنز کی فہرست تیار کر لی ہے ، جس پر پی ٹی آئی اپنا کام کر رہی ہے ۔ یہ معاملہ ہر فورم پر اٹھائیں گے اور اس کی رپورٹ بانی پی ٹی آئی کو دیں گے۔
انہوں نے کہا کہ پی ٹی آئی کا 2019 میں مدارس رجسٹریشن کا معاہدہ درست تھا۔ تحریک انصاف اس معاہدے پر آج بھی قائم ہے ۔ مدارس کی رجسٹریشن ہونی چاہیے۔ مدارس میں بچوں کو جدید علوم بھی پڑھائے جانے چاہییں۔
بیرسٹر گوہر نے کہا کہ فیصل واوڈا اکثر ایسے بیانات دیتے رہتے ہیں۔ میں ان کے کسی بیان کا جواب نہیں دیتا۔ سب کو بانی پی ٹی آئی کی رہائی کی کوشش کرنی چاہیے۔ بانی پی ٹی آئی کی زندگی ہمارے لیے اہم ہے۔
صحافی نے سوال کیا کہ ڈی چوک احتجاج میں زیادہ جانی نقصان نہیں ہوا جب کہ جھوٹ زیادہ پھیلایا گیا، جس پر بیرسٹر گوہر نے جواب دیا کہ وہ انہوں نے مختلف انداز میں کہا، پہلے 8 تھے، پھر 12 ہو گئے۔
احتجاج میں جاں بحق افراد کی تعداد پر علیمہ خان سے اختلاف کے سوال پر انہوں نے کہا کہ میں پارٹی کو سامنے رکھتے ہوئے ذمے دارانہ بیان دیتا ہوں اور اس میں کور کمیٹی اور دیگر قیادت کے ساتھ مکمل مشاورت کے بعد بیان دیتا ہوں۔
