دماغ کھانے والے وائرس نے کراچی میں دو جانیں لے لی

دماغ کھانے والے وائرس نے کراچی میں دو جانیں لے لی

کراچی (13 جولائی 2024): دماغ خور جرثومہ نگلیریا نے کراچی میں دو قیمتی جانیں لے لیں۔ محکمہ صحت سندھ کے مطابق ضلع شرقی کا 35 سالہ رہائشی محمد علی میمن اور لانڈھی کا 22 سالہ رہائشی اورنگزیب نگلیریا سے متاثر ہو کر جان کی بازی ہار گئے۔

تفصیلات کے مطابق محمد علی میمن دس روز تک شدید بخار میں مبتلا رہے جبکہ اورنگزیب کو بخار کے ساتھ متلی اور سردرد کی علامات ظاہر ہوئیں۔ محمد علی میمن کے اہل خانہ کا خدشہ ہے کہ وضو کے دوران نگلیریا جرثومہ ان کی ناک میں داخل ہوا۔ محکمہ صحت سندھ کی تحقیقات کے مطابق اورنگزیب حالیہ دنوں میں اپنے دوستوں کے ساتھ پکنک کے لیے واٹر پارک گئے تھے۔

محکمہ صحت سندھ نگلیریا کی روک تھام کے لیے متحرک ہوگیا ہے اور اس سلسلے میں مختلف کمیونٹی آگاہی سیشنز منعقد کر رہا ہے۔ نگلیریا سے بچاؤ کے لیے کمیونٹیز میں کلورین کی گولیاں بھی تقسیم کی جا رہی ہیں۔

محکمہ صحت سندھ نے مشتبہ علاقوں میں کلورینیشن کو یقینی بنایا ہے اور کہا ہے کہ کراچی میں دو اور حیدر آباد میں ایک شخص نگلیریا کے سبب جاں بحق ہو چکے ہیں۔