مراد سعید، حماد اظہر سمیت 8 پی ٹی آئی رہنما اشتہاری قرار
لاہور:انسداد دہشت گردی کی عدالت نے 9 مئی کو کلمہ چوک پر کنٹینر جلانے کے مقدمے میں پی ٹی آئی کے 8 روپوش رہنماؤں کو اشتہاری قرار دے دیا، جن میں مراد سعید، حماد اظہر اور میاں اسلم اقبال شامل ہیں۔
عدالت نے اس مقدمے میں دیگر رہنماؤں زبیر خان نیازی، حامد رضا گیلانی، محمد جاوید، عبد الصمد اور واثق قیوم کو بھی اشتہاری قرار دیا۔
جج ارشد جاوید نے انسداد دہشت گردی عدالت میں ملزمان کے دائمی وارنٹ گرفتاری جاری کرتے ہوئے تھانہ نصیر آباد کے مقدمے پر پولیس کی درخواست پر کارروائی کی۔
پولیس نے درخواست میں مؤقف اختیار کیا کہ تمام ملزمان گرفتاری کے خوف سے روپوش ہو چکے ہیں اور جاری کردہ وارنٹس کے باوجود انہیں گرفتار نہیں کیا جا سکا۔
