عمران خان کی مذاکرات کی تجویز پر بیرسٹر گوہر کا بڑا بیان

چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ عمران خان نے ماضی میں بھی مذاکرات کی بات کی تھی اور یہ بات چیت ہونی چاہیے۔ اسلام آباد میں ڈسٹرکٹ کورٹس کے باہر میڈیا سے بات کرتے ہوئے انہوں نے کہا کہ 9 مئی کے مقدمے میں کیس سے ڈسچارج ہونے کی درخواست دائر کی گئی ہے کیونکہ ان مقدمات میں تمام الزامات جھوٹے ہیں اور ان میں بریت ہوگی۔

بیرسٹر گوہر نے مزید کہا کہ تحریک انصاف نے وزیراعظم اور دیگر حکومتی شخصیات کے خلاف بھی درخواست دائر کی ہے۔ ان کا کہنا تھا کہ دنیا بھر میں احتجاج کے دوران گولیاں نہیں چلیں، لیکن یہاں مظاہرین کے بیٹھنے سے پہلے ہی شیلنگ شروع کر دی گئی تھی۔

انہوں نے یہ بھی واضح کیا کہ پی ٹی آئی نے مذاکرات کا ہمیشہ کہا ہے اور مذاکرات ضروری ہیں کیونکہ سیاسی مسائل کا حل صرف بات چیت کے ذریعے ہی ممکن ہے۔ ان کا کہنا تھا کہ مذاکرات میں کوئی شرائط نہیں رکھی گئی تھیں، تاہم مطالبات ضرور پیش کیے گئے۔

چیئرمین پی ٹی آئی نے کہا کہ ماضی میں بھی مذاکرات ہوئے تھے، لیکن ایک مرحلے کے بعد رابطہ ختم ہو گیا۔ انہوں نے مزید کہا کہ مقدمات درج کرنے کا ایک طریقہ کار ہوتا ہے، لیکن اب ملک کو بہتر کی طرف بڑھنا چاہیے کیونکہ اس صورتحال کا اب مزید جاری رہنا نقصان دہ ہے۔