22 اگست کے جلسے کی تیاریوں کے لیے اپوزیشن قیادت کا اہم اجلاس

22 اگست کے جلسے کی تیاریوں کے لیے اپوزیشن قیادت کا اہم اجلاس

اسلام آباد: 22 اگست کو ہونے والے جلسے کی تیاریوں کے سلسلے میں گرینڈ اپوزیشن کی قیادت کا اہم اجلاس محمود خان اچکزئی کی صدارت میں منعقد ہوا۔

اجلاس میں قومی اسمبلی کے اپوزیشن لیڈر عمر ایوب اور تحریک انصاف کے چیئرمین بیرسٹر گوہر شریک ہوئے۔ اس کے علاوہ، سابق سپیکر قومی اسمبلی اسد قیصر، شبلی فراز اور صاحبزادہ حامد رضا بھی اس اہم اجلاس میں موجود تھے۔ اجلاس کے دوران 22 اگست کو اسلام آباد میں ہونے والے جلسے کے انتظامات اور تیاریوں پر تفصیلی بات چیت کی گئی۔

اجلاس میں شرکاء نے ملک کی موجودہ سیاسی صورتحال پر بھی غور کیا اور اسلام آباد ہائیکورٹ کے بانی پی ٹی آئی کے متعلق تازہ فیصلے پر تبادلہ خیال کیا۔ اجلاس کے دوران شرکاء نے پارلیمنٹ میں حکومت کے کردار پر بھی گہری تشویش کا اظہار کیا۔

تحریک انصاف کے قائدین نے اس موقع پر کہا کہ پرامن جلسہ کرنا ہمارا آئینی اور جمہوری حق ہے۔ انہوں نے مزید کہا کہ انتظامیہ کی اجازت سے 22 اپریل کو اسلام آباد کے ترنول مقام پر جلسہ منعقد کیا جائے گا۔ 22 تاریخ کو اسلام آباد میں ایک عظیم الشان جلسہ ہوگا اور اس میں شرکت کے لیے ملک بھر سے کارکنان کو ہدایت دے دی گئی ہے۔

عمر ایوب نے اپنے بیان میں امید ظاہر کی کہ انتظامیہ ہمارے جلسے میں کوئی رکاوٹ نہیں ڈالے گی۔ انہوں نے مزید کہا کہ تحریک انصاف کے تمام جلسے ہمیشہ پرامن رہے ہیں۔ پاکستان میں آئین کی بحالی اور قانون کی حکمرانی کے لیے ہماری جدوجہد جاری رہے گی، اور حکومت کے خلاف ملک گیر مہم کا جلد اعلان کیا جائے گا۔