پیپلز پارٹی کی حکومت پر سست انٹرنیٹ اور سوشل میڈیا بندش پر شدید تنقید
اسلام آباد :پاکستان پیپلز پارٹی (پی پی پی) نے سست انٹرنیٹ سروسز اور سوشل میڈیا پلیٹ فارمز کی بندش پر حکومت کو شدید تنقید کا نشانہ بنایا۔ قومی اسمبلی کے اجلاس میں پیپلز پارٹی کی رکن قومی اسمبلی شازیہ مری نے اظہار خیال کرتے ہوئے کہا کہ انٹرنیٹ کی رفتار کی حالت ناقابل برداشت ہو چکی ہے، اور وزارت آئی ٹی مکمل ناکامی کا شکار ہے۔ انہوں نے سوال اٹھایا، "یہ کون سی فائر وال ہے اور ہم جواب کس سے طلب کریں؟”
شازیہ مری نے مزید کہا کہ ڈیجیٹل نیشن پاکستان بل لانے پر مضحکہ خیز صورتحال پیدا ہو گئی ہے، کیونکہ انٹرنیٹ سہولیات موجود ہی نہیں اور اس کے باوجود حکومت بل پیش کر رہی ہے۔
پیپلز پارٹی کے رکن اسمبلی عبدالقادر پٹیل نے بھی اپنی جماعت کی جانب سے سخت تحفظات کا اظہار کیا۔ انہوں نے سوال کیا کہ انٹرنیٹ سروسز کو اس قدر بدحال کیوں کیا گیا؟ ان کا کہنا تھا کہ آئی ٹی کے شعبے سے وابستہ افراد کو اربوں روپے کا نقصان ہو چکا ہے۔ انہوں نے دعویٰ کیا کہ "اتنی بدحالی کسی اور وزارت کی نہیں دیکھی، جتنی موجودہ دور میں وزارت آئی ٹی کی نظر آ رہی ہے۔”
