پولیس اہلکاروں کے بھی ای چالان کا سلسلہ شروع

پولیس اہلکاروں کے بھی ای چالان کا سلسلہ شروع

لاہور :صوبائی دارالحکومت لاہور میں انٹیلیجنس سسٹم کے ذریعے پولیس اہلکاروں کے بھی ای چالان کا سلسلہ شروع ہو گیا ہے۔ لاہور میں بغیر ہیلمٹ موٹرسائیکل سواروں کے خلاف آرٹیفیشل انٹیلیجنس سسٹم کو فعال کر دیا گیا ہے، جس کے تحت شہر کے داخلی و خارجی راستوں اور ماڈل روڈز پر بغیر ہیلمٹ موٹرسائیکل سواروں کا داخلہ مکمل طور پر بند کر دیا گیا ہے۔

سی ٹی او لاہور عمارہ اطہر نے بتایا کہ آرٹیفیشل انٹیلیجنس سسٹم کے ذریعے اب تک 2 لاکھ 27 ہزار 761 چالان ٹکٹس جاری کیے جا چکے ہیں جبکہ مینوئل طریقہ کار سے بغیر ہیلمٹ 3 لاکھ 10 ہزار موٹرسائیکل سواروں کے خلاف کارروائی عمل میں لائی گئی ہے۔ بغیر ہیلمٹ موٹرسائیکل سواروں کا ٹریفک دفاتر میں بھی داخلہ بند کر دیا گیا ہے اور فریش لائسنس کے حصول کے لیے ہیلمٹ لازمی قرار دیا گیا ہے۔

عمارہ اطہر نے مزید کہا کہ بغیر ہیلمٹ پارکنگ کی بھی اجازت نہیں ہوگی۔ مال روڈ، کینال روڈ اور جیل روڈ پر 95 فیصد شہری ہیلمٹ پہننے کی پابندی کر رہے ہیں، جو ایک خوش آئند اقدام ہے۔ ہیلمٹ کو ٹینکی پر رکھنے یا بازو میں لٹکانے پر بھی چالان جاری کیا جا رہا ہے۔ ہیلمٹ انفورسمنٹ مہم سے شہر میں ہیڈ انجری کیسز میں نمایاں کمی دیکھنے میں آئی ہے۔ چالان کا مقصد شہریوں کی جان و مال کے تحفظ کو یقینی بنانا ہے۔