آج کی ترقی براڈبینڈ انٹرنیٹ ہے، موٹروے نہیں:بلاول بھٹو

چیئرمین پاکستان پیپلزپارٹی بلاول بھٹو زرداری نے کہا ہے کہ آج کے دور میں ترقی کا اصل پیمانہ موٹروے نہیں، بلکہ براڈبینڈ انٹرنیٹ کی سہولت ہے۔ انہوں نے بتایا کہ دنیا کا پہلا کمپیوٹر وائرس لاہور کے دو نوجوانوں نے بنایا تھا۔

سکھر میں آئی بی اے یونیورسٹی کے کانووکیشن سے خطاب کرتے ہوئے بلاول بھٹو نے کہا کہ طلبہ کو اپنی تعلیم ملک کی ترقی اور اس کا مثبت تشخص اجاگر کرنے کے لیے استعمال کرنی چاہیے۔ انہوں نے کہا کہ آج پاکستان کو غربت، معاشی عدم مساوات اور موسمیاتی تبدیلی جیسے بڑے مسائل کا سامنا ہے۔

انہوں نے نوجوانوں پر زور دیا کہ وہ پرامن اور جمہوری طریقے سے اپنے ڈیجیٹل حقوق کے لیے آواز اٹھائیں۔ ان کے مطابق ڈیجیٹل حقوق کا مطلب ہے بہتر انٹرنیٹ کی سہولت اور ڈیٹا کی پرائیویسی کا تحفظ۔

بلاول بھٹو نے اعلان کیا کہ وہ سندھ سمیت پورے ملک کے تعلیمی اداروں کا دورہ کریں گے اور نوجوانوں سے ڈیجیٹل حقوق کے قوانین کے لیے تجاویز لیں گے۔ انہوں نے طلبہ کو سوشل میڈیا پر اپنی رائے اور مشورے دینے کی دعوت دی تاکہ سب مل کر اس اہم موضوع پر کام کر سکیں۔

انہوں نے کہا کہ اسلام آباد میں موجود "بابے”، جنہیں انٹرنیٹ یا سوشل میڈیا ایپس کا علم نہیں، وہ یہ نہیں سمجھتے کہ بہتر انٹرنیٹ نوجوانوں کو دنیا سے جوڑ سکتا ہے، چاہے وہ پاکستان کے کسی دیہات میں ہی کیوں نہ ہوں۔

موسمیاتی تبدیلی کے حوالے سے بلاول بھٹو نے کہا کہ اگر ان خطرات کو نہ روکا گیا تو پاکستان کو مسلسل سیلاب اور دیگر آفات کا سامنا رہے گا۔ انہوں نے کہا کہ ہمیں اپنے تمام منصوبے، جیسے سڑکیں، گھر اور بجلی کے منصوبے، موسمیاتی تبدیلی کے اثرات کو مدنظر رکھ کر بنانے ہوں گے۔

انہوں نے کہا کہ دنیا کے ترقی یافتہ ممالک نے اپنی صنعتوں کے ذریعے دولت کمائی، لیکن اس کے منفی اثرات دیگر ممالک پر ڈالے۔ اب ہمیں ان سے مطالبہ کرنا ہوگا کہ وہ اس نقصان کو ٹھیک کرنے کے لیے اپنا کردار ادا کریں۔

سابق چیئرمین نے زور دیا کہ ترقی یافتہ ممالک کو اپنی ذمہ داری قبول کرنی چاہیے اور موسمیاتی تبدیلی سے ہونے والے نقصان کی تلافی کے لیے عملی اقدامات کرنے چاہییں