پاکستان اور سعودی عرب کے درمیان ریکوڈک منصوبے میں بڑی پیش رفت

اسلام آباد:وفاقی کابینہ نے ریکوڈک منصوبے کے 15 فیصد شیئرز سعودی عرب کو فروخت کرنے کی منظوری دے دی ہے، جس سے پاکستان کو 540 ملین ڈالرز حاصل ہوں گے۔
تفصیلات کے مطابق یہ معاہدہ بین الحکومتی ٹرانزیکشن ایکٹ کے تحت طے پایا ہے، جس کے تحت سعودی عرب کو یہ شیئرز براہ راست منتقل کیے جائیں گے۔ سعودی عرب یہ رقم دو مراحل میں ادا کرے گا۔ پہلے مرحلے میں 10 فیصد شیئرز کی منتقلی کے بعد 330 ملین ڈالرز فراہم کیے جائیں گے، جبکہ دوسرے مرحلے میں 5 فیصد شیئرز کی منتقلی کے بعد 210 ملین ڈالرز ادا کیے جائیں گے۔
سعودی فنڈ برائے ترقی بلوچستان میں معدنیات کے شعبے کو مزید فروغ دینے کے لیے اضافی 150 ملین ڈالرز کی سرمایہ کاری کرے گا۔ اس کے علاوہ، سعودی عرب نے چاغی کے علاقے میں معدنی وسائل کی تلاش اور سرمایہ کاری کے امکانات پر آمادگی ظاہر کی ہے۔
ریکوڈک منصوبے میں وفاقی اور بلوچستان حکومت کے مشترکہ طور پر 50 فیصد شیئرز ہیں، جبکہ باقی شیئرز بین الاقوامی کمپنیوں کی ملکیت ہیں۔ یہ منصوبہ بلوچستان میں معدنی وسائل کی ترقی کے لیے ایک اہم پیش رفت تصور کیا جا رہا ہے۔