بہاولپور: گیس لیکیج کے باعث دو ننھی بہنیں جاں بحق۔ والدہ بے ہوش

بہاولپور کے علاقے ساجد اعوان ٹاؤن میں گیس لیکج کے باعث المناک حادثہ پیش آیا، جس میں دو کمسن بہنیں دم گھٹنے سے جاں بحق ہوگئیں جبکہ ان کی والدہ بے ہوش ہوگئیں۔

ریسکیو 1122 کو اطلاع دی گئی کہ ایک گھر میں گیس بھرنے کے باعث ماں اور بچے بے ہوش ہو گئے ہیں۔ ریسکیو ٹیم فوری طور پر جائے وقوعہ پر پہنچی، جہاں معلوم ہوا کہ تحریم اعجاز، زوجہ اعجاز نصیر، اپنے بچوں کے ہمراہ کمرے میں سو رہی تھیں۔ رات کے وقت گیس چولہے کا بٹن کھلا رہ جانے کے باعث کمرے میں گیس بھر گئی، جس سے دو سالہ مناحل اور آٹھ ماہ کی نوال دم گھٹنے سے جاں بحق ہو گئیں، جبکہ والدہ نیم بے ہوشی کی حالت میں پائی گئیں۔

ریسکیو ٹیم نے فوری طور پر تینوں افراد کو وکٹوریہ ہسپتال بہاولپور منتقل کیا، جہاں ڈاکٹرز نے بچیوں کی موت کی تصدیق کر دی، جبکہ ان کی والدہ کو طبی امداد فراہم کی جا رہی ہے۔ واقعے کی اطلاع پولیس کو بھی دے دی گئی ہے، جو مزید تحقیقات کر رہی ہے۔