کراچی (اسٹاف رپورٹر) سندھ ہائیکورٹ نے سابق صدر ڈاکٹر عارف علوی کو ان کے منجمد بینک اکاؤنٹ سے 10 لاکھ روپے نکالنے کی عبوری اجازت دے دی۔ یہ فیصلہ ان کے بینک اکاؤنٹس منجمد کیے جانے کے خلاف دائر درخواست کی سماعت کے دوران سنایا گیا۔
ذرائع کے مطابق سندھ ہائیکورٹ کے آئینی بینچ کے روبرو کیس کی سماعت ہوئی، جس میں نیشنل سائبر کرائم ایجنسی کے ڈائریکٹر وقار احمد عدالت میں پیش ہوئے اور جواب جمع کرانے کے لیے مہلت طلب کی۔ سماعت کے دوران درخواست گزار کے وکیل نے عدالت کو آگاہ کیا کہ سابق صدر، ان کی اہلیہ اور بچوں کے بینک اکاؤنٹس منجمد کیے گئے ہیں، جس کے باعث وہ مالی طور پر شدید مشکلات کا سامنا کر رہے ہیں۔
اس پر جسٹس کے کے آغا نے برہمی کا اظہار کرتے ہوئے ریمارکس دیے کہ عدالت تاخیری حربے اچھی طرح سمجھتی ہے۔ بعد ازاں عدالت نے سابق صدر عارف علوی کو عبوری ریلیف دیتے ہوئے ان کے اکاؤنٹ سے 10 لاکھ روپے تک نکالنے کی اجازت دے دی۔ عدالت نے تفتیشی افسر کو بھی آئندہ سماعت پر مکمل ریکارڈ کے ساتھ حاضری یقینی بنانے کا حکم دیا ہے۔ کیس کی مزید سماعت 19 جون تک ملتوی کر دی گئی۔