وزیراعلیٰ پنجاب کا مٹی دھول سے نجات کیلئے جدید طریقہ لاگو کرنے کا فیصلہ

وزیراعلیٰ پنجاب مریم نواز نے لاہور میں فضائی آلودگی اور مٹی دھول سے نجات کے لیے چین کے طرز پر جدید طریقے لاگو کرنے کا فیصلہ کیا ہے۔
انہوں نے لاہور کے 1500 تعمیراتی مقامات پر پانی کے چھڑکاؤ کا نظام نصب کرنے کا حکم دیا ہے، یہ مقامی سطح پر تیار کردہ ٹیکنالوجی ہے جس کا تجربہ پچھلے تین ہفتوں سے جاری تھا۔ انوائرمنٹ پروٹیکشن اتھارٹی نے ان تجربات کی کامیابی کے بعد اس منصوبے کو عملی طور پر نافذ کرنے کی منظوری دی ہے۔
وزیراعلیٰ پنجاب نے سی اینڈ ڈبلیو اور ایل ڈی اے کو فوری طور پر واٹر سپرنکل سسٹم لگانے کی ہدایت کی۔ یہ نظام پانی کو فوارے کی شکل میں اس طرح استعمال کرے گا کہ تعمیراتی مقامات پر مٹی اور گردوغبار نہ پیدا ہو۔ قذافی سٹیڈیم میں 15 جنوری تک واٹر سپرنکل سسٹم کی تنصیب کا حکم دیا گیا ہے۔
فیصلے کے تحت تمام تعمیراتی مقامات پر سبز کپڑے سے ڈھانپنا بھی لازمی ہوگا تاکہ تعمیراتی سرگرمیوں کے دوران دھول نہ اڑے اور سیمنٹ کا پھیلاؤ نہ ہو۔
حکومت نے یہ فیصلہ کیا ہے کہ 10 فروری کے بعد اس طریقہ کار پر عمل نہ کرنے پر قانونی کارروائی کی جائے گی اور مقدمات درج کیے جائیں گے۔
سینئر وزیر مریم اورنگزیب نے کہا کہ اس جدید نظام سے سموگ کے خاتمے کے مشن میں مزید تیزی اور بہتری آئے گی۔ انہوں نے مزید کہا کہ ماحولیاتی تحفظ کا ادارہ گزشتہ 9 ماہ سے فضائی آلودگی کے خاتمے کی کوششیں کر رہا ہے۔
مریم اورنگزیب نے زور دیا کہ ماحولیاتی بہتری کے لیے رویوں میں تبدیلی، شہری تعاون، اور جدید مشینری کے استعمال کی ضرورت ہے۔