کراچی: پاکستان پیپلز پارٹی کے سینئر رہنما، دانشور، کالم نگار اور ممتاز ڈراما نگار تاج حیدر مختصر علالت کے بعد 83 برس کی عمر میں انتقال کر گئے۔ ان کے انتقال سے ملک ایک مدبر سیاستدان، ادیب اور نظریاتی کارکن سے محروم ہو گیا۔
تاج حیدر 8 مارچ 1942 کو بھارتی ریاست راجستھان کے شہر کوٹہ میں ایک علمی گھرانے میں پیدا ہوئے۔ قیام پاکستان کے بعد وہ اپنے خاندان کے ہمراہ ہجرت کر کے کراچی میں مقیم ہو گئے۔ انہوں نے ابتدائی تعلیم گورنمنٹ بوائز ہائی اسکول، رنچھور لائنز کراچی سے حاصل کی
تاج حیدر نے 1967 میں ذوالفقار علی بھٹو کی قیادت میں قائم ہونے والی پاکستان پیپلز پارٹی میں شمولیت اختیار کی اور پارٹی کے بانی ارکان میں شامل رہے۔ وہ ہمیشہ پارٹی کے بائیں بازو کے نظریاتی دھڑے سے وابستہ رہے اور اپنی تمام عمر پارٹی سے وفاداری نبھاتے رہے۔ تاج حیدر کو پیپلز پارٹی کا ایک نظریاتی ستون سمجھا جاتا تھا۔ وہ متعدد بار سینیٹر منتخب ہوئے اور پارٹی کے مختلف اہم عہدوں پر فائز رہے۔ وہ پارٹی کے سیکرٹری اطلاعات بھی رہ چکے ہیں اور اہم قومی معاملات پر پارٹی مؤقف پیش کرنے میں پیش پیش رہتے تھے۔
تاج حیدر صرف سیاستدان ہی نہیں بلکہ ایک ممتاز ادیب اور دانشور بھی تھے۔ انہوں نے پاکستان ٹیلی وژن کے لیے کئی یادگار ڈرامے لکھے جن میں معاشرتی اور سیاسی موضوعات پر گہری نظر دکھائی دیتی تھی۔ ان کے کئی کالمز ملکی سیاست اور معاشرتی مسائل پر روشنی ڈالتے رہے۔ انہیں 2006 میں 13واں پی ٹی وی ایوارڈ بہترین ڈراما سیریل کے لیے دیا گیا جبکہ 2012 میں حکومت پاکستان نے انہیں سائنسی خدمات پر ’ستارہ امتیاز‘ سے نوازا۔
تاج حیدر کے انتقال پر پیپلز پارٹی کے چیئرمین بلاول بھٹو زرداری، سابق صدر آصف علی زرداری سمیت ملک بھر کی سیاسی و سماجی شخصیات نے گہرے رنج و غم کا اظہار کیا ہے۔ بلاول بھٹو نے اپنے تعزیتی پیغام میں کہا کہ تاج حیدر پارٹی کا اثاثہ تھے، ان کی خدمات کو ہمیشہ یاد رکھا جائے گا۔ تاج حیدر کی نمازِ جنازہ اور تدفین کے حوالے سے جلد آگاہ کیا جائے گا ۔ ان کے انتقال سے پاکستان ایک اصول پسند، دیانت دار اور علم دوست شخصیت سے محروم ہو گیا ہے۔
