پیپلز پارٹی کا قیدی نمبر 804 کی رہائی کیلئے حکومت کو عجیب مشورہ

اسلام آباد:پاکستان پیپلزپارٹی کے رکن قومی اسمبلی عبدالقادر پٹیل نے حکومت کو دلچسپ مشورہ دیتے ہوئے کہا ہے کہ وہ کسی بھی قیدی نمبر 804 کو رہا کردے تاکہ تحریک انصاف کا مطالبہ بھی پورا ہو جائے۔
قومی اسمبلی کے اجلاس میں اظہار خیال کرتے ہوئے عبدالقادر پٹیل نے طنزیہ انداز میں کہا کہ پی ٹی آئی ہر وقت ایک نئی بات کرتی ہے، لیکن اگر وہ قیدی نمبر 804 کی رہائی چاہتی ہے تو حکومت کو چاہیے کہ وہ اس قیدی کو رہا کر دے، چاہے وہ کوئی بھی ہو۔ ان کے اس جملے پر ایوان میں قہقہے گونج اٹھے۔
عبدالقادر پٹیل نے مزید کہا کہ اگر حکومت یہ اقدام کر لے تو تحریک انصاف کی جانب سے احتجاج اور مطالبات ختم ہو جائیں گے۔ انہوں نے یہ بات مزاحیہ انداز میں کہی، جس سے ایوان میں دلچسپ ماحول پیدا ہو گیا۔
اس موقع پر انہوں نے وزیر دفاع خواجہ آصف پر بھی تنقید کی اور کہا کہ جب سید خورشید شاہ بات کر رہے تھے تو خواجہ آصف انہیں ٹوکتے رہے، لیکن اب وہ خود رانا تنویر سے بات کرنے میں مصروف ہیں۔
قومی اسمبلی کے اس اجلاس میں عبدالقادر پٹیل کی جانب سے کی گئی گفتگو ایوان میں ہلچل اور خوشگوار فضاء کا سبب بن گئی۔