چولستان میں ’گرین پاکستان‘ منصوبے کا آغاز، وزیراعلیٰ پنجاب اور آرمی چیف کی شرکت

چولستان کے کنڈائی اور شاپو کے علاقوں میں ’گرین پاکستان‘ منصوبے کا باقاعدہ آغاز کر دیا گیا، جس کا مقصد پاکستان میں زرعی ترقی کو فروغ دینا اور کسانوں کو جدید سہولیات فراہم کرنا ہے۔ اس منصوبے کی افتتاحی تقریب میں وزیراعلیٰ پنجاب مریم نواز، آرمی چیف جنرل سید عاصم منیر، وفاقی اور صوبائی وزراء، زرعی ماہرین اور کسانوں نے شرکت کی۔

تقریب کے دوران گرین ایگری مال اینڈ سروس کمپنی، اسمارٹ ایگری فارم، زرعی تحقیق اور سہولت مرکز کا بھی افتتاح کیا گیا۔ ان منصوبوں کا مقصد کسانوں کو جدید زرعی آلات، معیاری بیج، کھاد اور کیڑے مار ادویات کی فراہمی کو یقینی بنانا ہے، تاکہ پاکستان کی زراعت کو جدید خطوط پر استوار کیا جا سکے۔

افتتاحی تقریب سے خطاب کرتے ہوئے وزیراعلیٰ پنجاب مریم نواز نے کہا کہ "چولستان اور پنجاب میں جدید زراعت کے انقلاب کی بنیاد رکھ دی گئی ہے۔ ان منصوبوں سے کسانوں کی زندگی میں بہتری آئے گی اور زراعت کے شعبے میں ایک نئے دور کا آغاز ہوگا۔”انہوں نے مزید کہا کہ حکومت کی کوشش ہے کہ کسانوں کو سہولیات فراہم کر کے انہیں زیادہ سے زیادہ پیداوار حاصل کرنے کے قابل بنایا جائے، جس سے نہ صرف ملکی معیشت کو استحکام ملے گا بلکہ خوراک کی خودکفالت بھی ممکن ہوگی۔

آرمی چیف جنرل سید عاصم منیر نے تقریب میں خطاب کرتے ہوئے کہا کہ پاکستان میں زرعی ترقی ملکی معیشت کی ریڑھ کی ہڈی ہے اور اس شعبے میں سرمایہ کاری سے ملک کی اقتصادی صورتحال میں بہتری آئے گی۔ انہوں نے اس بات پر زور دیا کہ زراعت میں جدید طریقے اپنانے کی اشد ضرورت ہے، تاکہ کم زمین پر زیادہ پیداوار حاصل کی جا سکے اور کسانوں کو زیادہ منافع ملے۔

گرین ایگری مال اینڈ سروس کمپنی کسانوں کو معیاری بیج، کھاد اور کیڑے مار ادویات فراہم کرے گی، تاکہ فصلوں کی پیداوار کو بہتر بنایا جا سکے۔ جدید ٹیکنالوجی سے لیس فارمز جہاں کسان جدید زرعی طریقے سیکھ سکیں گے اور اپنی پیداوار میں اضافہ کر سکیں گے۔ زرعی تحقیق اور سہولت مراکز کسانوں کو سائنسی بنیادوں پر تربیت دی جائے گی اور جدید زرعی تحقیق سے آگاہ کیا جائے گا۔

تقریب کے دوران وزیراعلیٰ پنجاب نے شہداء کے بچوں اور غازیوں کو زمین کی الاٹمنٹ کے خطوط بھی دیے، جس کا مقصد ان خاندانوں کو معاشی طور پر مستحکم کرنا ہے جنہوں نے ملک کے لیے قربانیاں دی ہیں۔