عید الفطر کی آمد قریب آتے ہی پاکستانی عوام میں نئے کرنسی نوٹوں کے حصول کی خواہش ایک بار پھر شدت اختیار کر گئی ہے، تاہم اسٹیٹ بینک آف پاکستان کی جانب سے اس سال نئے نوٹوں کے اجراء کے امکانات کافی کم نظر آ رہے ہیں۔
رمضان المبارک کے آخری دنوں میں شہریوں کو روایتی طور پر اپنے عزیز و اقارب اور خاص طور پر بچوں کو عیدی دینے کے لیے نئے کرنسی نوٹ درکار ہوتے ہیں۔ ماضی میں اسٹیٹ بینک عید سے قبل کروڑوں روپے مالیت کے نئے نوٹ جاری کرتا تھا، لیکن کورونا وبا کے بعد پچھلے دو سالوں سے یہ سلسلہ معطل ہے، جس کی وجہ سے عوام کو خستہ حال پرانے نوٹوں پر ہی اکتفا کرنا پڑا۔
ذرائع کا کہنا ہے کہ اس سال بھی نئے نوٹوں کے باضابطہ اجرا کا امکان کم ہے، کیونکہ اسٹیٹ بینک کی جانب سے اب تک کوئی سرکاری اعلان نہیں کیا گیا۔ دوسری جانب، کرنسی ڈیلرز کے پاس بلیک مارکیٹ میں نئے نوٹ فروخت کیے جاتے ہیں، جہاں شہری انہیں اضافی قیمت ادا کر کے حاصل کرنے پر مجبور ہوتے ہیں۔
عید الفطر 2025 کا امکان 31 مارچ کو ظاہر کیا جا رہا ہے، جس کے دوران چند دن کی چھٹیاں متوقع ہیں۔ تاہم، چاند کی رویت کے حوالے سے حتمی اعلان مرکزی رویت ہلال کمیٹی کرے گی۔ عوام اب بھی اس امید میں ہیں کہ شاید اسٹیٹ بینک عید کے موقع پر خوشی دوبالا کرنے کے لیے نئے کرنسی نوٹ جاری کرنے کا فیصلہ کرے۔
