امریکا کے سرکاری دورے پر موجود چیف آف آرمی اسٹاف فیلڈ مارشل عاصم منیر نے واشنگٹن ڈی سی میں مقیم پاکستانی کمیونٹی سے خصوصی ملاقات کی، جہاں شرکاء نے ان کے اسٹیج پر آتے ہی جوش و خروش سے ’’جیوے جیوے پاکستان‘‘ کے نعرے بلند کیے۔ اس جذباتی لمحے میں فیلڈ مارشل نے دل پر ہاتھ رکھ کر پاکستانیوں کے جذبے کو سراہا اور ان کے ساتھ نعرہ دہراتے ہوئے قومی یکجہتی کا پیغام دیا۔
آئی ایس پی آر کے مطابق، اوورسیز پاکستانیوں کی جانب سے آرمی چیف کا پرتپاک استقبال کیا گیا۔ شرکاء نے قومی سلامتی کے تحفظ میں پاک فوج کی قربانیوں کو خراج تحسین پیش کیا، بالخصوص آپریشن ’’بنیان مرصوص / معرکۂ حق‘‘ میں فوج کی پیشہ ورانہ مہارت اور جرأت کو سراہا۔
خطاب میں جنرل عاصم منیر نے اوورسیز پاکستانیوں کو ملک کے سفیر قرار دیتے ہوئے کہا کہ بیرون ملک مقیم پاکستانی ترسیلات، سرمایہ کاری اور عالمی سطح پر کامیابیوں کے ذریعے وطن کی معیشت اور ساکھ کو بہتر بنانے میں کلیدی کردار ادا کر رہے ہیں۔ انہوں نے زور دیا کہ ان افراد سے مضبوط رابطہ برقرار رکھنا پاکستان کے لیے قیمتی وسائل اور تجربات حاصل کرنے کا ذریعہ بن سکتا ہے۔
اجلاس میں شریک افراد کو یہ موقع بھی فراہم کیا گیا کہ وہ براہِ راست آرمی چیف سے اپنے خیالات اور تجاویز کا اظہار کریں۔ جنرل منیر نے یقین دہانی کرائی کہ پاک فوج دنیا بھر میں بسنے والے پاکستانیوں سے قریبی رابطے اور تعاون کو مزید مستحکم بنانے کے لیے پُرعزم ہے۔ ملاقات کا اختتام ایک امید افزا عزم کے ساتھ ہوا کہ اندرون و بیرونِ ملک تمام پاکستانی، مل کر ایک مضبوط، مستحکم اور خوشحال پاکستان کی تعمیر میں اپنا کردار ادا کرتے رہیں گے
