خانیوال (ایم وائے کے نیوز ٹی وی) — خانیوال ریلوے اسٹیشن پر پیش آنے والے افسوسناک حادثے میں 27 مسافر زخمی ہو گئے۔ ابتدائی اطلاعات کے مطابق، حادثہ اس وقت پیش آیا جب ایک سگنل پول کی سیڑھی ریلوے ٹریک پر موجود تھی، جس سے گزرنے والی ٹرینوں کے مسافر زد میں آ گئے۔
ریلوے حکام کے مطابق، عوامی ایکسپریس اپ، عوامی ایکسپریس ڈاؤن اور موسیٰ پاک ایکسپریس میں سوار متعدد مسافر کھڑکیوں سے ہاتھ باہر نکال کر بیٹھے تھے کہ اچانک سیڑھی سے ٹکرا گئے، جس کے نتیجے میں خواتین، بزرگوں اور نوجوانوں سمیت 27 افراد زخمی ہو گئے۔ زخمیوں کو فوری طور پر قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔
واقعے کے حوالے سے حکام کا کہنا ہے کہ ابتدائی تحقیقات میں یہ بات سامنے آئی ہے کہ ریلوے ٹریک پر موجود سیڑھی کو نامعلوم افراد نے دانستہ طور پر دھکیلا، جس کے باعث حادثہ پیش آیا۔ ریلوے انتظامیہ نے واقعے کی مکمل تحقیقات کا آغاز کر دیا ہے تاکہ ذمہ دار عناصر کو بے نقاب کیا جا سکے۔ ریلوے پولیس اور سیکیورٹی ادارے جائے وقوعہ پر پہنچ گئے ہیں اور شواہد اکھٹے کیے جا رہے ہیں۔ دوسری جانب مسافروں اور شہریوں نے واقعے پر شدید تحفظات کا اظہار کرتے ہوئے ریلوے حکام سے سوال کیا ہے کہ آخر کس طرح اتنی بڑی غفلت ممکن ہوئی اور سیکورٹی کے اقدامات کیوں مؤثر نہیں تھے۔
یہ حادثہ ایک بار پھر ریلوے کے سیکیورٹی اور نگرانی کے نظام پر سوالیہ نشان بن گیا ہے، جب کہ مسافروں نے حکومت سے مطالبہ کیا ہے کہ ذمہ داروں کو فوری طور پر قانون کے کٹہرے میں لایا جائے اور آئندہ ایسے واقعات سے بچاؤ کے لیے سخت اقدامات کیے جائیں۔ ریلوے حکام نے یقین دہانی کرائی ہے کہ زخمیوں کے علاج میں کوئی کسر نہیں چھوڑی جائے گی، اور واقعے میں ملوث عناصر کو جلد گرفتار کیا جائے گا۔ حادثے کی مکمل رپورٹ آئندہ چند روز میں جاری کیے جانے کا امکان ہے۔
