چیئرمین واپڈا سجاد غنی مستعفی

اسلام آباد (ایم وائے کے نیوز ٹی وی): واٹر اینڈ پاور ڈویلپمنٹ اتھارٹی (واپڈا) کے چیئرمین سجاد غنی نے اپنے عہدے سے استعفیٰ دے دیا ہے۔ باوثوق ذرائع کے مطابق سجاد غنی نے اپنی ذمہ داریوں سے علیحدگی ذاتی وجوہات کی بنیاد پر اختیار کی ہے۔

ذرائع کے مطابق وزیراعظم شہباز شریف کو چیئرمین واپڈا کا استعفیٰ موصول ہو چکا ہے جسے انہوں نے منظوری کے لیے کابینہ ڈویژن کو ارسال کر دیا ہے۔ سجاد غنی کے استعفے کو موجودہ واپڈا کے انتظامی اور تکنیکی معاملات کے پس منظر میں ایک اہم پیش رفت قرار دیا جا رہا ہے۔

سجاد غنی ایک تجربہ کار انجینئر کے طور پر جانے جاتے ہیں، جنہوں نے مختلف بڑے آبی منصوبوں میں کلیدی کردار ادا کیا۔ ان کی سربراہی میں دیامر بھاشا، داسو اور مہمند ڈیم جیسے اہم منصوبوں پر کام کی رفتار میں تیزی لائی گئی، تاہم بعض انتظامی مسائل اور پالیسی اختلافات کی بازگشت بھی مختلف ادوار میں سنائی دیتی رہی۔