پی ٹی آئی کارکنان کی رہائی کا عمل شروع، انسداد دہشت گردی عدالت نے 164 کارکنان کی روبکاریں جاری کردیں

اسلام آباد: انسداد دہشت گردی عدالت نے 26 نومبر کے احتجاج کے دوران درج ہونے والے مقدمات میں 164 پی ٹی آئی کارکنان کی رہائی کے لیے روبکاریں جاری کردیں، جس کے بعد ان کی رہائی کا عمل شروع ہوگیا ہے۔ ذرائع کے مطابق، 139 کارکنان پر دہشت گردی کی دفعات کے تحت مقدمات درج کیے گئے تھے، جب کہ 25 کارکنان پر دفعہ 144 کی خلاف ورزی اور دیگر الزامات کے تحت کیسز بنائے گئے تھے۔ اسلام آباد ہائی کورٹ نے 120 سے زائد پی ٹی آئی کارکنان کی ضمانتیں منظور کر لی تھیں، جس کے بعد ان کی رہائی کا قانونی عمل شروع کر دیا گیا۔

ذرائع کے مطابق پی ٹی آئی کارکنان کے خلاف مختلف تھانوں میں 12 سے زائد مقدمات درج ہیں، جن میں سے بیشتر مقدمات اسلام آباد اور راولپنڈی میں درج کیے گئے تھے۔ اڈیالہ جیل میں قید کارکنان کی آج ہی رہائی متوقع ہے جب کہ اٹک اور جہلم جیل میں قید کارکنان 1 سے 2 روز میں رہا ہوں گے۔