عمران خان عید سے پہلے رہا ہوں گے۔ پوری کوشش کر رہے ہیں: بیرسٹر گوہر علی

اسلام آباد (ایم وائے کے نیوز) پاکستان تحریک انصاف (پی ٹی آئی) کے چیئرمین بیرسٹر گوہر علی خان نے کہا ہے کہ انہیں پوری امید ہے کہ بانی پی ٹی آئی عمران خان کو عید سے قبل رہائی مل جائے گی۔ اسلام آباد ہائیکورٹ کے باہر میڈیا سے گفتگو کرتے ہوئے ان کا کہنا تھا کہ عمران خان کی رہائی کیلئے جو سوالات کارکن اٹھا رہے ہیں، وہ بالکل بجا ہیں، ہم ان کے جذبات کی قدر کرتے ہیں۔

بیرسٹر گوہر علی نے میڈیا سے بات کرتے ہوئے کہا کہ عمران خان کی رہائی کیلئے ہم ہر ممکن آئینی، قانونی اور جمہوری کوشش کر رہے ہیں۔ انہوں نے کہا کہ "کوئی تصور بھی نہیں کر سکتا کہ عمران خان نے دو سال جیل میں کیوں گزارے، مگر ہم پرعزم ہیں کہ جلد آزادی کا سورج طلوع ہو گا۔” انہوں نے کارکنان سے اپیل کی کہ وہ اپنے جذبات پر قابو رکھیں اور قیادت پر اعتماد کریں۔ ان کے مطابق پی ٹی آئی قیادت نے نہ صرف سڑکوں پر احتجاج کیا بلکہ پارلیمان کے اندر بھی آواز اٹھائی ہے۔ ان کا کہنا تھا کہ عمران خان کا ہر لمحہ اللہ پر توکل کے ساتھ گزر رہا ہے اور وہ اللہ تعالیٰ سے ہی مدد کے طلبگار ہیں۔

بیرسٹر گوہر علی کا کہنا تھا کہ ہمیں امید ہے کہ کیسز جلد فکس ہوں گے اور میرٹ پر فیصلے آئیں گے۔ انہوں نے کہا کہ ججز بھی بار بار فیصلے لکھتے لکھتے تھک چکے ہیں جبکہ ہمارے کارکن صبر کا مظاہرہ کرتے کرتے تھک چکے ہیں۔ انہوں نے کہا کہ ہمارا مطالبہ صرف انصاف ہے اور ہم چاہتے ہیں کہ عدالتیں جلد از جلد فیصلہ کریں تاکہ عمران خان کو انصاف مل سکے۔ ۔