کراچی (ایم وائے کے نیوز ٹی وی) گرمی سے نڈھال کراچی کے باسیوں کے لیے محکمہ موسمیات نے بڑی خبر دے دی ہے۔ شہر قائد میں طویل انتظار کے بعد بالآخر مون سون کی پہلی بارش کا سلسلہ کل شام سے شروع ہونے کا امکان ہے، جو اتوار تک وقفے وقفے سے جاری رہے گا۔ محکمہ موسمیات نے اس دوران اربن فلڈنگ کا خدشہ بھی ظاہر کر دیا ہے، جس کے پیش نظر شہریوں کو محتاط رہنے کی ہدایت کی گئی ہے۔
محکمہ موسمیات کے ماہر انجم نذیر نے بتایا کہ کراچی میں مون سون کے پہلے سپیل کا آغاز جمعہ کی شام سے ممکن ہے۔ ان کے مطابق مون سون کا یہ سسٹم ہفتے کے روز سب سے زیادہ فعال رہے گا اور شہر بھر میں دن بھر تیز بارش متوقع ہے۔ انجم نذیر کا کہنا تھا کہ ہفتے کے دن بارش کا سلسلہ مسلسل وقفے وقفے سے جاری رہے گا، جس کے باعث شہر کے نشیبی علاقوں میں اربن فلڈنگ کا خطرہ ہے۔ انہوں نے بتایا کہ اتوار کو بھی بارش کا سلسلہ وقفے وقفے سے جاری رہنے کا امکان موجود ہے، جس سے معمولات زندگی متاثر ہو سکتے ہیں۔
محکمہ موسمیات کے مطابق بھارتی ریاست گجرات میں اس وقت ایک کم دباؤ کا سسٹم موجود ہے جو آئندہ دنوں سندھ کے مختلف علاقوں میں بارش کا سبب بنے گا۔ اس سسٹم کے زیر اثر نہ صرف کراچی بلکہ بدین، ٹھٹہ، میرپور خاص سمیت دیگر شہروں میں بھی بارش کی پیش گوئی کی گئی ہے۔ آج کے دن کے حوالے سے انجم نذیر نے بتایا کہ کراچی میں درجہ حرارت زیادہ سے زیادہ 35 ڈگری سینٹی گریڈ تک جانے کا امکان ہے جبکہ اطراف کے شہروں میں کہیں کہیں بارش متوقع ہے۔
