اوورسیز پاکستانی ترسیلات زر کا بائیکاٹ جاری رکھیں: بانی پی ٹی آئی

راولپنڈی:سابق وزیر اعظم اور پاکستان تحریک انصاف (پی ٹی آئی) کے سربراہ عمران خان نے ایک بار پھر بیرون ملک مقیم پاکستانیوں سے مطالبہ کیا ہے کہ وہ حکومت کے خلاف اپنے احتجاج کے طور پر ترسیلات زر بھیجنے کا بائیکاٹ کریں۔
عمران خان نے گزشتہ روز ایکس (سابقہ ٹوئٹر) پر جاری اپنے بیان میں کہا’’میں ایک بار پھر بیرون ملک میں مقیم پاکستانیوں پر زور دیتا ہوں کہ وہ ترسیلات زر کا بائیکاٹ جاری رکھیں۔
انہوں نے اپنے پیغام میں دعویٰ کیا کہ ترسیلات بھیجنے سے موجودہ حکومت مضبوط ہوگی جو عوام پر مزید بوجھ ڈال رہی ہے۔
عمران خان کا یہ بیان ایک ایسے وقت میں سامنے آیا ہے جب حکومت اور پی ٹی آئی کے درمیان مذاکرات تعطیل پر ہیں، جس کی وجہ جوڈیشل کمیشن کے معاملے پر پیدا ہونے والا تعطل ہے۔ یہ مذاکرات گزشتہ ماہ شروع ہوئے تھے لیکن ابھی تک کسی حتمی نتیجے پر نہیں پہنچ سکے۔
اپنے ایک اور پیغام میں عمران خان نے 8 فروری کو ملک بھر میں "یوم سیاہ” کے طور پر منانے کا اعلان کیا ہے۔ انہوں نے خیبرپختونخوا میں خصوصی طور پر بڑے پیمانے پر احتجاج اور شٹر ڈاؤن کی ہدایات دی ہیں۔
عمران خان کا ترسیلات زر کے بائیکاٹ پر زور دینا اور احتجاج کی کال دینا اس سیاسی کشیدگی کا حصہ ہے جو پی ٹی آئی اور حکومت کے درمیان موجود ہے۔ ان کے بیانات اور اقدامات سے نہ صرف بیرون ملک پاکستانی متاثر ہو سکتے ہیں بلکہ ملکی معیشت پر بھی اس کے اثرات مرتب ہو سکتے ہیں۔