اسلام آباد: سپریم کورٹ نے 26 ویں آئینی ترمیم کے خلاف دائر درخواستوں پر فریقین کو نوٹس جاری کرتے ہوئے سماعت آئندہ تین ہفتوں کے لیے ملتوی کر دی۔
جسٹس امین الدین خان کی سربراہی میں آٹھ رکنی آئینی بینچ نے درخواستوں پر سماعت کی۔ بینچ میں جسٹس جمال خان مندوخیل، جسٹس محمد علی مظہر، جسٹس عائشہ ملک، جسٹس حسن اظہر رضوی، جسٹس مسرت ہلالی، جسٹس نعیم اختر افغان، اور جسٹس شاہد بلال شامل تھے۔
عدالت نے فل کورٹ تشکیل دینے اور عدالتی کارروائی کو براہ راست نشر کرنے کی درخواست پر بھی نوٹس جاری کر دیا۔
سماعت کے آغاز پر وکلا حامد خان اور فیصل صدیقی نے روسٹرم سنبھالا۔ درخواست گزاروں کی جانب سے فل کورٹ تشکیل دینے کی استدعا کی گئی اور مؤقف اپنایا گیا کہ آئینی معاملے کو دیکھنے کے لیے تمام ججز پر مشتمل بینچ بنایا جائے۔
جسٹس جمال مندوخیل نے مکالمے کے دوران واضح کیا کہ ججز کی نامزدگی جوڈیشل کمیشن کرتا ہے، اور آئینی بینچ تشکیل دینے کے لیے منتخب ججز ہی موجودہ بینچ کا حصہ ہیں۔ جسٹس محمد علی مظہر نے وکلا سے کہا کہ موجودہ بینچ کو ہی فل کورٹ تصور کریں، کیونکہ فل کورٹ کی تشکیل کا اختیار چیف جسٹس کے پاس ہے۔
عدالت میں وکیل فیصل صدیقی نے مؤقف اپنایا کہ 26 ویں ترمیم اختیارات کی تقسیم کے اصول کے خلاف ہے، اور یہ کہ آئینی ترمیم کی منظوری کے وقت ایوان نامکمل تھا۔ جسٹس عائشہ ملک نے استفسار کیا کہ کیا تمام صوبوں کی نمائندگی مکمل تھی، جس پر وکیل نے بتایا کہ خیبرپختونخوا کی نمائندگی مکمل نہیں تھی۔
عدالت میں وکلاء کی جانب سے سوالات اٹھائے گئے کہ مخصوص نشستوں اور ارکان کی آزادی کے بغیر یہ ترمیم کیسے ہو سکتی ہے۔ تاہم جسٹس محمد علی مظہر نے واضح کیا کہ آئینی کیسز کو انتخابات سے مشروط کر کے زیر التوا رکھنا مناسب نہیں ہوگا۔
آئینی ترمیم کے خلاف درخواستوں کی سماعت کے دوران سپریم کورٹ کی عمارت میں خصوصی انتظامات کیے گئے تھے۔ درخواستیں تحریک انصاف اور دیگر دو درجن سے زائد جماعتوں کی جانب سے دائر کی گئی ہیں۔
