راولپنڈی (ایم وائے کے نیوز ٹی وی) پاک فوج کے ترجمان لیفٹیننٹ جنرل احمد شریف چودھری نے واضح الفاظ میں کہا ہے کہ فوج کا بانی پاکستان تحریک انصاف (پی ٹی آئی) یا کسی بھی سیاسی جماعت سے نہ تو کوئی خفیہ رابطہ ہے اور نہ ہی کوئی مذاکرات ہو رہے ہیں۔ ان کا کہنا تھا کہ سیاست میں فوج کی کوئی دلچسپی نہیں، یہ کام صرف سیاستدانوں کا ہے اور مسلح افواج کو سیاست سے دور رکھا جائے۔
ایم وائے کے نیوز ٹی وی کے مطابق برطانوی نشریاتی ادارے کو انٹرویو دیتے ہوئے ڈی جی آئی ایس پی آر نے دو ٹوک الفاظ میں کہا کہ فوج صرف اور صرف ریاست پاکستان کے ساتھ بات کرتی ہے، نہ کہ کسی مخصوص سیاسی شخصیت یا جماعت کے ساتھ۔ ان کا کہنا تھا کہ افواج پاکستان آئینی دائرہ کار میں رہ کر حکومتِ وقت کے احکامات کی روشنی میں کام کرتی ہیں، اور جو بھی جماعت حکومت میں ہو، وہی ریاستی نمائندہ تصور کی جاتی ہے۔
لیفٹیننٹ جنرل احمد شریف نے کہا کہ فوج وفاقی اور صوبائی حکومتوں کے احکامات کے تحت تعینات ہوتی ہے، اور عوامی تحفظ اس کی اولین ترجیح ہے۔ ان کا کہنا تھا کہ خیبرپختونخوا اور بلوچستان میں فوج کی موجودگی بھی صوبائی حکومت کی درخواست پر عمل میں لائی گئی، اور اس کا مقصد صرف امن و امان کی بہتری اور عوامی فلاح ہے، نہ کہ سیاسی مفادات۔
ڈی جی آئی ایس پی آر نے بھارتی میڈیا اور سوشل میڈیا پر جاری اس پروپیگنڈا کو بھی مسترد کیا کہ بلوچ عوام فوج کے ساتھ نہیں۔ ان کا کہنا تھا کہ یہ ایک سٹرٹیجک غلط فہمی ہے اور جو لوگ یہ تصور رکھتے ہیں، انہیں حقیقت تسلیم کرنی چاہیے۔ ’’بلوچستان کے عوام پاکستان کے ساتھ ہیں اور ہمیں ان پر فخر ہے،‘‘ ان کا دوٹوک مؤقف تھا۔
