ایف آئی اے نے کھربوں روپے کی مبینہ ٹیکس چوری کی تحقیقات کا آغاز کردیا۔
ذرائع کے مطابق ایف آئی اے نے 1120 ارب روپے کی ٹیکس چوری کی تحقیقات شروع کردی ہیں، جس کے لیے ایڈیشنل ڈی جی نارتھ ایف آئی اے کی سربراہی میں 5 رکنی ٹیم تشکیل دی گئی ہے۔
ایف آئی اے ذرائع کے مطابق امپورٹڈ میٹریل پر 1120 ارب روپے کی مبینہ ٹیکس چوری ہوئی، جبکہ 108 کمپنیاں 389 ارب روپے کی ٹیکس چوری میں ملوث قرار پائی ہیں، جنہیں تحقیقات کے سلسلے میں نوٹسز جاری کردیے گئے ہیں۔
ذرائع کے مطابق خوردنی تیل کی ایک نجی کمپنی کے مالکان اور ایم ڈی کو بھی طلب کیا گیا ہے۔ تحقیقات سینیٹ کی قائمہ کمیٹی برائے داخلہ کی سفارش پر شروع کی گئی ہیں۔
