پاکستان سعودی عرب کی خودمختاری اور سالمیت کی حمایت جاری رکھے گا: ترجمان دفتر خارجہ
اسلام آباد میں ہفتہ وار بریفنگ دیتے ہوئے ترجمان دفتر خارجہ سجاد حیدر خان نے سعودی عرب میں حوثیوں کے حملوں کی مذمت کرتے ہوئے کہا کہ پاکستان نے سعودی قیادت اور عوام سے اظہار یکجہتی کیا ہے اور سعودی عرب کی خودمختاری و سالمیت کی حمایت جاری رکھے گا۔
انہوں نے کہا کہ پاکستان اور سعودی عرب کے درمیان دوطرفہ دفاعی تعاون جاری ہے، جبکہ پاکستانی فورسز سعودی عرب میں تربیت اور لاجسٹک مقاصد کے لیے موجود ہیں۔ تاہم دفاعی معاہدے پر عملدرآمد کے لیے وقت درکار ہوگا اور جلد دفاعی تعاون کے مزید پہلو سامنے آئیں گے۔
ترجمان دفتر خارجہ نے کہا کہ کشمیر اقوام متحدہ کے ایجنڈے پر موجود حل طلب مسئلہ ہے، بھارتی دعوؤں اور ہتھکنڈوں سے کشمیر کی متنازع حیثیت تبدیل نہیں ہوسکتی۔ اقوام متحدہ کا آفیشل نقشہ بھی جموں و کشمیر کی متنازع حیثیت ظاہر کرتا ہے، لہٰذا بھارتی اقدامات کی کوئی حیثیت نہیں۔
سجاد حیدر خان نے مزید کہا کہ پاکستان بھارت کے شہر سہارن پور میں مسجد مسمار کرنے کے واقعے کی مذمت کرتا ہے، یہ واقعہ بابری مسجد کی یاد تازہ کرتا ہے۔
ترجمان دفتر خارجہ کا کہنا تھا کہ افغان طلبہ پر پابندی عائد کرنے کا تاثر درست نہیں۔ افغان طلبہ کے خلاف مکمل پابندی کا کوئی فیصلہ نہیں کیا گیا، جبکہ درست ویزا اور ڈگری پروگرام میں رجسٹریشن رکھنے والے افغان طلبہ اپنی تعلیم مکمل کرسکتے ہیں۔
