دورِ نایاب: ڈی جی ایل ڈی اے طاہر فاروق کا اربن پلاننگ اینڈ ڈیزائن سنٹر کا دورہ
ڈی جی ایل ڈی اے طاہر فاروق نے ایل ڈی اے اربن پلاننگ اینڈ ڈیزائن سنٹر کا دورہ کیا، جہاں ایڈیشنل ڈی جی ہیڈکوارٹرز اور چیف ٹاؤن پلانرز نے انہیں بریفنگ دی۔
ڈی جی ایل ڈی اے طاہر فاروق نے کہا کہ سنٹر میں ٹاؤن پلاننگ اور ماسٹر پلاننگ کے افسران ایک ہی جگہ تعینات ہوں گے۔ ایل ڈی اے مرحلہ وار اپنی تمام سروسز ای بز پر منتقل کر رہا ہے، جس کے بعد شہریوں کو نقشے کی منظوری اور دیگر سروسز کے لیے ایل ڈی اے آنے کی ضرورت نہیں ہوگی۔
انہوں نے بتایا کہ ایل ڈی اے کا سیلنگ اور ڈی سیلنگ کا عمل بھی ڈیجیٹل کردیا گیا ہے جبکہ تمام نوٹسز کیو آر کوڈ پر مبنی کردیے گئے ہیں۔
ڈی جی ایل ڈی اے کے مطابق فیلڈ عملہ شہریوں کو کیو آر کوڈ پر مبنی کارڈ دکھانے کا پابند ہوگا۔ جلد ہی ایل ڈی اے کی فیلڈ ٹیموں کو باڈی کیمز بھی پہنائے جائیں گے، جبکہ ایل ڈی اے کا نام استعمال کرنے والے نجی افراد اور فرمز کے خلاف مقدمات درج کرائے جا رہے ہیں۔ تمام ٹیکنیکل سیکشنز کی کارپوریٹ طرز پر اپ گریڈیشن کا سلسلہ بھی جاری ہے۔
ان کے مطابق غیر قانونی کمرشل سرگرمیوں کی روک تھام اور غیر قانونی تعمیرات کی مانیٹرنگ بھی سنٹر سے کی جائے گی۔
دورے کے موقع پر ایڈیشنل ڈی جی ہیڈکوارٹرز، چیف ٹاؤن پلانرز، چیف آئی ٹی آفیسر اور چیف میٹروپولیٹن پلانر بھی موجود تھے۔
