فی الحال کوئی بھی مون سون سسٹم سندھ پر اثرانداز ہوتا نظر نہیں آرہا: محکمہ موسمیات

کراچی: محکمہ موسمیات نے سندھ میں فی الحال مون سون بارشوں کا امکان مسترد کردیا ہے۔

محکمہ موسمیات کے مطابق سندھ کے بیشتر علاقوں میں آج موسم گرم اور مرطوب رہنے کی توقع ہے، تاہم کراچی سمیت سندھ کی ساحلی پٹی اور ضلع تھرپارکر میں بعض مقامات پر بوندا باندی ہوسکتی ہے۔

کراچی کے موسم کے حوالے سے محکمہ موسمیات کا کہنا ہے کہ آئندہ 3 روز کے دوران شہر میں مطلع جزوی ابر آلود اور موسم مرطوب رہنے کا امکان ہے، جبکہ صبح اور رات کے اوقات میں بوندا باندی ہوسکتی ہے۔

محکمہ موسمیات کے مطابق کراچی میں زیادہ سے زیادہ درجہ حرارت 32 سے 34 ڈگری سینٹی گریڈ کے درمیان رہنے کی توقع ہے۔

محکمہ موسمیات کا کہنا ہے کہ اگست کے دوران سندھ میں معمول سے کم بارشیں ہونے کا امکان ہے اور فی الحال کوئی مون سون سسٹم سندھ پر اثرانداز ہوتا دکھائی نہیں دے رہا۔