بیلجیئم میں بدترین جنگلاتی آگ، 3 ہزار ہیکٹر رقبہ متاثر
بیلجیئم کے جنگلات میں بھڑکنے والی شدید آگ نے تقریباً 3 ہزار ہیکٹر رقبے کو اپنی لپیٹ میں لے لیا ہے اور اب آگ جرمنی کی سرحد کی جانب بڑھ رہی ہے۔
غیر ملکی میڈیا کے مطابق آگ پر قابو پانے کے لیے ہیلی کاپٹرز، فائر فائٹرز، فوجی اہلکار اور مقامی کسان مشترکہ طور پر امدادی کارروائیوں میں مصروف ہیں۔
مقامی حکام نے انخلا کرنے والے شہریوں کو فی الحال اپنے گھروں کو واپس نہ جانے کی ہدایت کی ہے، جبکہ جرمنی کی جانب بڑھنے والی آگ کو روکنے کے لیے بھی کوششیں جاری ہیں۔
یورپی فاریسٹ فائر انفارمیشن سسٹم کے مطابق یہ بیلجیئم میں ریکارڈ کی جانے والی سب سے بڑی جنگلاتی آگ ہے، جو 2011 میں لگنے والی آگ سے دگنے سے بھی زیادہ رقبے پر پھیل چکی ہے۔
واضح رہے کہ یورپ کے مختلف علاقوں میں شدید گرمی اور خشک سالی کے باعث جنگلات میں آگ لگنے کے واقعات میں اضافہ ہوا ہے۔
