نادرا کی ایف آئی اے کے خلاف شکایت، خفیہ معلومات کے حصول کا پروٹوکول توڑنے کا الزام
اسلام آباد: نادرا نے خفیہ معلومات کے حصول کے لیے مقررہ پروٹوکول کی خلاف ورزی پر ڈی جی ایف آئی اے کو باضابطہ شکایت ارسال کردی۔
نادرا کی جانب سے ڈی جی ایف آئی اے کو بھیجے گئے مراسلے میں کہا گیا ہے کہ آسٹریلوی پولیس کی درخواستوں سے متعلق ایف آئی اے کی جانب سے نادرا کو مینوئل خطوط ارسال کیے گئے۔
مراسلے کے بعد ڈی جی ایف آئی اے نے تمام زونز کو سخت ہدایات جاری کرتے ہوئے کہا ہے کہ ایف آئی اے کے سرکلز اور دفاتر معلومات کے حصول کے لیے ڈیٹا شیئرنگ ماڈیول پورٹل کے ذریعے نادرا کو درخواست بھیجیں۔
حکمنامے میں ایف آئی اے کے تمام زونز کو متعلقہ محکموں سے براہِ راست رابطے سے روک دیا گیا ہے، جبکہ معلومات کے حصول کے لیے اینٹی منی لانڈرنگ سرکل کے ذریعے رابطہ کرنے کی ہدایت بھی کی گئی ہے۔
ڈی جی ایف آئی اے نے واضح کیا ہے کہ حکمنامے کی خلاف ورزی کرنے والے متعلقہ حکام کے خلاف سخت کارروائی کی جائے گی۔ ان کا کہنا ہے کہ مینوئل ڈاک کے ذریعے خفیہ معلومات لیک ہونے کا خدشہ رہتا ہے۔
