ایران کا امریکی فوجیوں کو ہلاک یا گرفتار کرکے حوالے کرنے والوں کے لیے 30 ہزار ڈالر انعام کا اعلان
ایرانی فوج کے سربراہ امیر حاتمی نے امریکی فوجیوں کو ہلاک یا گرفتار کرکے ایرانی حکام کے حوالے کرنے والے افراد کے لیے 30 ہزار ڈالر انعام کا اعلان کیا ہے۔
دی نیوز انٹرنیشنل کی رپورٹ کے مطابق امیر حاتمی نے کہا کہ بڑی تعداد میں لوگوں کی درخواستوں کے بعد یہ منصوبہ تیار کیا گیا ہے۔
انہوں نے کہا کہ امریکی فوجی کو گرفتار یا ہلاک کرکے ایرانی حکام کے حوالے کرنے والے شخص کو 30 ہزار ڈالر یا 5 ارب ایرانی تومان انعام دیا جائے گا، جبکہ اگر یہ کارروائی کسی خاتون کی جانب سے کی گئی تو انعام کی رقم دگنی ہوگی۔
ایرانی آرمی چیف نے امریکا سے ایک بار پھر مشرق وسطیٰ سے نکلنے کا مطالبہ کرتے ہوئے کہا کہ امریکی فوج کو خلیج فارس، خلیج عمان یا آبنائے ہرمز میں داخلے کی اجازت نہیں ہے۔
غیر ملکی میڈیا رپورٹس کے مطابق ایران میں امریکی زمینی فوج کی کسی باقاعدہ تعیناتی کی اطلاع نہیں ہے، تاہم اپریل میں ایک امریکی طیارہ گرنے کے بعد امدادی کارروائی کے لیے امریکی اہلکار ایران میں داخل ہوئے تھے۔
