اسلام آباد: دفتر خارجہ نے سعودی عرب پر حوثیوں کے حملے پر شدید تشویش کا اظہار کرتے ہوئے کہا ہے کہ پاکستان خطے میں پیدا ہونے والی صورتحال پر گہری نظر رکھے ہوئے ہے۔
اسلام آباد میں ہفتہ وار پریس بریفنگ کے دوران ترجمان دفتر خارجہ سجاد حیدر خان نے کہا کہ سعودی عرب پر حوثیوں کا حملہ انتہائی تشویشناک اور قابل مذمت ہے، جس سے دنیا بھر کے مسلمانوں کے جذبات مجروح ہوئے۔
ترجمان نے کہا کہ پاکستان مشرق وسطیٰ کی صورتحال کا انتہائی سنجیدگی سے جائزہ لے رہا ہے اور حوثی حملوں کے تناظر میں خطے میں پیدا ہونے والی صورتحال پر نظر رکھے ہوئے ہے۔
سجاد حیدر خان کے مطابق مکہ دفاعی معاہدے کے حوالے سے تینوں ممالک نے پریس ریلیز جاری کی ہیں، جبکہ یہ معاہدہ دفاعی نوعیت کا ہے۔
ترجمان دفتر خارجہ نے خطے میں بڑھتی ہوئی کشیدگی اور اس کے ممکنہ اثرات پر بھی تشویش کا اظہار کیا۔ ان کا کہنا تھا کہ باب المندب کی صورتحال بھی باعث تشویش ہے۔
بھارتی بحری جہاز کے پاکستانی بحریہ کے جہاز سے ٹکرانے کے حوالے سے ترجمان نے کہا کہ بھارتی بحری جہاز نے پاکستانی بحریہ کے جہاز کے انتہائی قریب جارحانہ انداز میں نقل و حرکت کی، جس کے نتیجے میں دونوں بحری جہازوں کے درمیان ٹکر ہوئی۔
سجاد حیدر خان کے مطابق پاکستان نے بھارتی کارروائی پر شدید احتجاج ریکارڈ کرایا ہے۔ گزشتہ روز بھارتی ناظم الامور کو طلب کرکے بھارتی بحری جہاز کی جانب سے پاکستانی بحریہ کے جہاز کو ٹکر مارنے اور بھارتی بحریہ کی اشتعال انگیزی پر احتجاج کیا گیا۔
ترجمان دفتر خارجہ نے کہا کہ بھارتی اقدام بین الاقوامی قانون اور 1991 کے دوطرفہ معاہدے کی سنگین خلاف ورزی ہے۔ انہوں نے بھارت پر زور دیا کہ وہ جنوبی ایشیا کو مزید عدم استحکام سے دوچار کرنے والی غیر ذمہ دارانہ کارروائیوں سے باز رہے۔
