ملک بھر میں عید میلادالنبی ﷺ مذہبی عقیدت و احترام کے ساتھ منائی جا رہی ہے
ملک بھر میں نبی آخرالزماں حضرت محمد مصطفیٰ ﷺ کا یومِ ولادت مذہبی عقیدت و احترام اور جوش و خروش کے ساتھ منایا جا رہا ہے۔
اس موقع پر مساجد، سرکاری و نجی عمارتوں، گلیوں، محلوں، چوکوں اور شاہراہوں کو برقی قمقموں اور خوبصورت سجاوٹ سے آراستہ کیا گیا ہے، جبکہ مختلف مقامات پر محافلِ میلاد، نعت خوانی اور ریلیوں کا انعقاد کیا جا رہا ہے۔
عید میلادالنبی ﷺ کے دن کا آغاز نمازِ فجر کے بعد لاہور اور پشاور میں 21، 21 توپوں کی سلامی سے ہوا۔
کراچی میں گلی گلی چراغاں کیا گیا ہے۔ مختلف علاقوں میں محافلِ میلاد کا انعقاد اور عاشقانِ رسول ﷺ کی جانب سے ریلیاں نکالی جا رہی ہیں۔ مختلف اسٹالز پر موئے مبارک کی زیارت کے ساتھ مسجد نبوی ﷺ اور خانہ کعبہ کے ماڈلز بھی رکھے گئے ہیں۔
لاہور میں مساجد، گھروں، سڑکوں اور سرکاری عمارتوں کو خوبصورتی سے سجایا گیا ہے، جبکہ ملک کی ترقی، خوشحالی اور سلامتی کے لیے خصوصی دعائیں کی جا رہی ہیں۔
پشاور میں رحمت اللعالمین ﷺ کو گلہائے عقیدت پیش کرنے کے لیے نعت خوانی اور محافلِ میلاد کا اہتمام کیا گیا ہے، جبکہ کوئٹہ میں بھی مختلف علاقوں میں چراغاں، محافلِ نعت اور جلوسوں کا انعقاد کیا جا رہا ہے۔
اسلام آباد میں بھی شہر کو خوبصورتی سے سجایا گیا ہے اور مختلف مقامات پر جشنِ آمدِ رسول ﷺ کے حوالے سے تقریبات اور خصوصی عبادات کا اہتمام کیا جا رہا ہے۔
کراچی میں عید میلادالنبی ﷺ کا مرکزی جلوس دوپہر ڈھائی بجے شہید مسجد کھارادر سے برآمد ہوگا، جو نیو میمن مسجد سے ہوتا ہوا عصر کے وقت گلزارِ حبیب مسجد پر اختتام پذیر ہوگا۔
ملک کے دیگر شہروں میں بھی مختلف جلوس اور مذہبی اجتماعات منعقد کیے جائیں گے۔ عید میلادالنبی ﷺ کے موقع پر کے الیکٹرک نے کراچی میں آج لوڈشیڈنگ نہ کرنے کا اعلان کیا ہے۔
