لاہور میں صحافیوں سے بات چیت کرتے ہوئے چیئرمین پاکستان کرکٹ بورڈ (پی سی بی) محسن نقوی نے کہا کہ بابر اعظم کی کپتانی کے مستقبل کے بارے میں ابھی تک کوئی گفتگو نہیں ہوئی۔
محسن نقوی نے بتایا کہ آج کی ملاقات میں کھلاڑیوں کے ساتھ ڈومیسٹک کرکٹ پر تبادلہ خیال ہوا، اور کھلاڑیوں نے ڈومیسٹک کرکٹ کے نظام کو بہتر بنانے پر زور دیا۔ ان کا کہنا تھا کہ کرکٹرز نے فٹنس کے معاملے میں کوئی رعایت نہ دینے کا مشورہ دیا ہے۔
محسن نقوی نے یہ بھی بتایا کہ ابھی تک کوچز کے ساتھ کوئی ملاقات نہیں ہوئی ہے۔
ایک صحافی کے سوال پر کہ بابر اعظم کپتان برقرار رہیں گے یا نہیں، محسن نقوی نے جواب دیا کہ ابھی اس بارے میں کوئی بات نہیں ہوئی۔
دوسری جانب، وائٹ بال ہیڈکوچ گیری کرسٹن اور اسسٹنٹ کوچ اظہر محمود نے چیئرمین پی سی بی سے ملاقات کی، جس کا دوسرا سیشن آج ہوگا۔
