"ورلڈ چیمپئن شپ میرا اگلا ہدف ہے۔ گولڈ میڈلسٹ ارشد ندیم کی وطن واپسی پر شاندار استقبال

ایشیئن ایتھلیٹکس چیمپئن شپ میں تاریخی گولڈ میڈل جیتنے کے بعد قومی ہیرو ارشد ندیم وطن واپس پہنچ گئے، جہاں لاہور ایئرپورٹ پر ان کا شاندار استقبال کیا گیا۔ مداحوں کی بڑی تعداد پھول لے کر ان کے استقبال کے لیے موجود تھی جبکہ "ارشد ندیم زندہ باد” کے نعروں سے فضا گونج اُٹھی۔

ایئرپورٹ پر ڈائریکٹر جنرل سپورٹس پنجاب خضر افضال چوہدری نے ارشد ندیم کا پرتپاک استقبال کیا اور انہیں قوم کا فخر قرار دیتے ہوئے کہا کہ وہ پاکستانی نوجوانوں کے لیے ایک حقیقی رول ماڈل ہیں۔ انہوں نے کہا کہ ارشد کی کامیابی سے ملک بھر میں کھیلوں کا جذبہ دوبارہ زندہ ہوا ہے۔

میڈیا سے گفتگو کرتے ہوئے ارشد ندیم نے اپنی شاندار کامیابی کو قوم کے نام کرتے ہوئے کہا کہ پاکستانی قوم، میڈیا اور کوچز کا دل سے شکر گزار ہوں۔ ان کا کہنا تھا کہ "ایشیئن چیمپئن شپ میں 50 سال بعد پاکستان کے لیے سونے کا تمغہ جیتنا میرے لیے اعزاز ہے۔ لیکن میری نظریں اب ورلڈ ایتھلیٹکس چیمپئن شپ پر ہیں اور ان شاء اللہ وہاں بھی گولڈ میڈل جیتوں گا۔”

انہوں نے اس بات پر زور دیا کہ پاکستان میں ایتھلیٹکس کے فروغ کے لیے قومی سطح پر مقابلوں کا انعقاد ضروری ہے تاکہ نوجوان ٹیلنٹ کو آگے آنے کا موقع ملے۔ ارشد ندیم نے پاک افواج سے اپنی وابستگی کا اظہار کرتے ہوئے کہا کہ "ہم سب پاک فوج کے ساتھ کھڑے ہیں، اور پاکستان کی عزت اور وقار کے لیے ہر میدان میں لڑیں گے۔”