قذافی سٹیڈیم میں آج سے پی ایس ایل کی رونقیں پھر سے نظر آئیں گی

لاہور (اسپورٹس ڈیسک) — ایچ بی ایل پاکستان سپر لیگ (پی ایس ایل) 2025 کے سنسنی خیز پلے آف مرحلے کا آغاز بدھ 22 مئی سے قذافی اسٹیڈیم لاہور میں ہو رہا ہے، جہاں ملک بھر سے کرکٹ کے شائقین کی نظریں فیصلہ کن مقابلوں پر جمی ہوئی ہیں۔ ٹورنامنٹ کے اس آخری اور اہم مرحلے میں چار بڑی ٹیمیں ٹرافی کی دوڑ میں شامل ہیں۔

پہلا پلے آف مقابلہ کوالیفائر کی صورت میں بدھ کو کھیلا جائے گا، جس میں پوائنٹس ٹیبل پر سرفہرست کوئٹہ گلیڈی ایٹرز کا سامنا دوسرے نمبر پر موجود دفاعی چیمپیئن اسلام آباد یونائیٹڈ سے ہوگا۔ یہ میچ رات 8 بجے قذافی اسٹیڈیم میں کھیلا جائے گا، جس کی فاتح ٹیم براہ راست فائنل کے لیے کوالیفائی کرے گی، جب کہ شکست خوردہ ٹیم کو ایلیمینیٹر 2 میں ایک اور موقع ملے گا۔

دوسرا اہم میچ ایلیمینیٹر 1 جمعرات 23 مئی کو کھیلا جائے گا، جس میں لاہور قلندرز اور کراچی کنگز مدِ مقابل ہوں گے۔ یہ میچ بھی رات 8 بجے شروع ہوگا۔ اس مقابلے میں شکست کھانے والی ٹیم ٹورنامنٹ سے باہر ہو جائے گی، جبکہ جیتنے والی ٹیم ایلیمینیٹر 2 میں کوالیفائر کی ہارنے والی ٹیم کا سامنا کرے گی۔ ایلیمینیٹر 2 جمعہ 24 مئی کو کھیلا جائے گا، جو کہ فائنل میں جگہ پانے کا آخری موقع ہوگا۔ اس کے بعد ایچ بی ایل پی ایس ایل 2025 کا فائنل اتوار 25 مئی کو قذافی اسٹیڈیم میں کھیلا جائے گا۔

پی سی بی کے مطابق تمام میچز کے لیے سیکیورٹی انتظامات کو حتمی شکل دے دی گئی ہے، جبکہ اسٹیڈیم میں داخلے، پارکنگ اور نشستوں کے لیے ہدایات جاری کی جا چکی ہیں۔ کرکٹ شائقین کی سہولت کے لیے خصوصی ٹریفک پلان اور آن گراؤنڈ سہولیات بھی فراہم کی جا رہی ہیں۔