پاکستان کرکٹ ٹیم نے نیوزی لینڈ کے خلاف تیسرے ٹی ٹوئنٹی میں شاندار کارکردگی کا مظاہرہ کرتے ہوئے نیا ریکارڈ قائم کر دیا۔
جمعہ کو ہونے والے میچ میں پاکستان نے 5 میچز کی سیریز کے تیسرے ٹی ٹوئنٹی میں نیوزی لینڈ کو 9 وکٹوں سے شکست دی۔ میزبان ٹیم نے پاکستان کو 205 رنز کا بڑا ہدف دیا، جو گرین شرٹس نے صرف 16 اوورز میں حاصل کر لیا۔
اوپنر محمد حارث نے 41 رنز کی اننگز کھیلی، جبکہ حسن نواز نے 44 گیندوں پر شاندار سنچری بنا کر نیا ریکارڈ قائم کیا۔ اس کے علاوہ کپتان سلمان علی آغا نے بھی عمدہ بیٹنگ کا مظاہرہ کرتے ہوئے 31 گیندوں پر 51 رنز بنائے۔
حسن نواز نے اس اننگز کے دوران پاکستان کی جانب سے تیز ترین ٹی ٹوئنٹی انٹرنیشنل سنچری بنا کر بابر اعظم کا ریکارڈ توڑ دیا۔ اس کامیابی کے ساتھ ہی پاکستان نے نیوزی لینڈ کے خلاف اپنی ٹی ٹوئنٹی تاریخ کا نیا ریکارڈ بھی بنا ڈالا۔
